بیجنگ (شِنہوا) چین کی ریاستی کونسل نے 15ویں پانچ سالہ منصوبے (2026-2030) کے دوران کاربن اخراج کی بلند ترین سطح تک پہنچنے کے لئے ایک جامع ایکشن پلان جاری کیا ہے، جس میں اس ہدف کے حصول کے لئے اہم اقدامات اور پالیسیوں کا خاکہ پیش کیا گیا ہے۔
منصوبے کے مطابق 2030 تک چین کا ہدف ہے کہ 2025 کی سطح کے مقابلے میں مجموعی قومی پیداوار (جی ڈی پی) کی فی یونٹ کاربن ڈائی آکسائیڈ اخراج میں 17 فیصد کمی کی جائے، جبکہ غیر فوسل توانائی کے استعمال کا حصہ 25 فیصد تک پہنچایا جائے۔
ان اقدامات کا مقصد مقررہ وقت کے اندر کاربن اخراج کی بلند ترین سطح حاصل کرنا، 2035 کے لئے چین کے قومی طور پر متعین ماحولیاتی اہداف کی تکمیل کی مضبوط بنیاد رکھنا اور کاربن کے خاتمے کی جانب پیش رفت کو تیز کرنا ہے۔
اس ایکشن پلان میں 5 اہم شعبوں میں ترجیحی اقدامات شامل ہیں جن میں توانائی کے ڈھانچے میں تیز رفتار اصلاح اور بہتری، ماحول دوست اور کم کاربن صنعتی ترقی کو فروغ دینا اور اہم شعبوں میں ماحول دوست اور کم کاربن منتقلی کے عمل کو مزید مضبوط بنانا شامل ہیں۔