تہران (شِنہوا) ایران کی اسلامی انقلابی گارڈ کور (آئی آر جی سی) نے کہا ہے کہ اس نے امریکہ کے تازہ حملوں کے جواب میں کویت اور بحرین میں واقع امریکی فوجی اڈوں کو نشانہ بنایا ہے۔
ایران کے نشریاتی ادارے پریس ٹی وی کے مطابق آئی آر جی سی کے جاری کردہ بیان میں کہا گیا ہے کہ اس نے کویت میں کیمپ عارف جان اور علی السالم ایئر بیس کے اہم بنیادی ڈھانچے اور تنصیبات کے علاوہ بحرین کے جفیر اور شیخ عیسیٰ میں موجود امریکی فوجی اڈوں کو نشانہ بنایا۔ بیان میں ان کارروائیوں کو ’امریکی معاہدہ شکنوں کے خلاف تادیبی کارروائی کے پہلے مرحلے‘ کا حصہ قرار دیا گیا۔
بیان میں مزید خبردار کیا گیا ہے کہ اگر امریکہ نے اپنے حملے دوبارہ شروع کئے تو ایران کا ردعمل خطے میں موجود دیگر امریکی فوجی اڈوں تک بھی وسیع کر دیا جائے گا۔
دوسری جانب امریکی سنٹرل کمانڈ نے کہا کہ امریکی افواج نے بدھ کے روز مسلسل دوسرے دن بھی ایران پر حملے کئے، جن کا مقصد ایران کی اس صلاحیت کو کمزور کرنا تھا جس کے ذریعے وہ آبنائے ہرمز میں جہاز رانی کی آزادی کے لئے خطرہ پیدا کر سکتا ہے۔