بشکیک(نیشنل ٹائمز)صدر مملکت آصف علی زرداری نے دورہ کرغزستان کے دوران منگل کو کرغز ہم منصب سادیر ژاپاروف نورگوجوئیوچ سے ملاقات کی ۔اس دوران دونوں رہنماؤں نے پاکستان اور کرغزستان میں برادرانہ تعلقات کو مزید مضبوط بنانے ،تجارت، توانائی ، سیاسی و تجارتی تعاون سمیت مختلف شعبوں میں تعاون بڑھانے پر اتفاق کیا۔ اس موقع پر وفاقی وزیر پارلیمانی امور طارق فضل ، وزیر مملکت برائے قومی صحت ڈاکٹر مختار بھرتھ، سینیٹر سلیم مانڈوی والا، ڈاکٹر عاصم حسین، کرغزستان میں پاکستان کے سفیر بھی موجود تھے ۔ملاقات میں دونوں رہنماؤں نے اس بات پر زور دیا کہ وسطی اور جنوبی ایشیا کے درمیان تعاون اور روابط کے وسیع امکانات سے فائدہ اٹھانے کیلئے امن اور محفوظ ماحول ناگزیر ہے ،انہوں نے خطے اور دنیا میں دہشت گرد حملوں کی مذمت بھی کی ۔ اس موقع پر جمہوریہ کرغز کی وزارت صحت اور پاکستان کی ڈرگ ریگولیٹری اتھارٹی (ڈریپ)کے درمیان ایک مفاہمتی یادداشت پر کرغز وزیر صحت دامیربیک عثمانوف اور پاکستان کے وزیر مملکت برائے قومی صحت خدمات ڈاکٹر مختار بھرتھ نے دستخط کیے ، بعد ازاں دونوں صدور نے مشترکہ اعلامیہ پر بھی دستخط کیے جبکہ وفود کی سطح پر مذاکرات سے خطاب میں صدر آصف علی زرداری نے کہا کہ پاکستان اور کرغزستان کو مل کر ترقی کے نئے راستے تلاش کرنا ہوں گے ،دونوں ممالک مشترکہ مذہبی، تاریخی اور ثقافتی رشتوں میں بندھے ہوئے ہیں اور ماضی میں شاہراہِ ریشم کے ذریعے ایک دوسرے کے زیادہ قریب تھے ،پاکستان مناسب قیمتوں پر اپنی مصنوعات کرغزستان کو فراہم کرنے کا خواہش مند ہے اور دونوں ممالک صنعت، تجارت اور دیگر شعبوں میں تعاون کے نئے مواقع پیدا کر سکتے ہیں۔