کنشاسا (شِنہوا) ایبولا کی روک تھام اور کنٹرول کے سلسلے میں بین الاقوامی تعاون کو مزید آگے بڑھانے کے لئے انسداد وبا کے چینی طبی ماہرین کی دوسری ٹیم جمہوریہ کانگو کے دارالحکومت کنشاسا پہنچ گئی۔
جمہوریہ کانگو کی وزارت صحت کے نمائندے لوکو مالیو ماریئس نے ہوائی اڈے پر وفد کا استقبال کیا۔
انہوں نے کہا کہ جمہوریہ کانگو اور چین کے درمیان دوستی کی تاریخ نصف صدی سے زیادہ پر محیط ہے جبکہ صحت کے شعبے میں دونوں ممالک کا تعاون خاص طور پر انتہائی نتیجہ خیز رہا ہے۔ ان کے مطابق صحت کے میدان میں اعلیٰ سطح کے تعاون نے جمہوریہ کانگو کی عوامی صحت کی صلاحیت کو مضبوط بنانے میں موثر کردار ادا کیا ہے۔
ماریئس نے بتایا کہ ملک میں ایبولا کی موجودہ وبا اب بھی ایک پیچیدہ صورتحال اختیار کئے ہوئے ہے اور جمہوریہ کانگو کی حکومت کو توقع ہے کہ چینی ماہرین کا دوسرا وفد وبا سے نمٹنے کی کوششوں میں بدستور بھرپور تعاون فراہم کرے گا۔
چینی ماہرین کی دوسری ٹیم کے سربراہ گو ژی چھیانگ نے کہا کہ ٹیم جلد از جلد اپنا کام شروع کرے گی اور صحت سے متعلق کانگو کے حکام اور پیشہ ور اداروں کے ساتھ قریبی تعاون کرے گی۔
انہوں نے مزید کہا کہ ٹیم وبائی امراض کی تحقیقات، لیبارٹری ٹیسٹ، مریضوں کے علاج، انفیکشن کی روک تھام، کنٹرول اور عملے کی تربیت کے شعبوں میں تکنیکی تعاون اور مدد فراہم کرے گی تاکہ جمہوریہ کانگو کی وبا کی روک تھام، کنٹرول اور علاج کی صلاحیت بہتر بنانے میں چینی مہارت سے فائدہ اٹھایا جا سکے۔