بیجنگ (شِنہوا) چین نے کاروباری اداروں کو ملازمتیں برقرار رکھنے، نوجوان کارکنوں کی بھرتی کی حوصلہ افزائی کرنے اور افرادی قوت کی مہارتوں میں بہتری لانے کے لئے بے روزگاری انشورنس سے متعلق متعدد پالیسیوں میں 2026 کے اختتام تک توسیع کر دی ہے۔
وزارت انسانی وسائل و سماجی تحفظ اور دیگر 3 محکموں کی جانب سے مشترکہ طور پر جاری ہونےوالے ایک سرکلر میں بتایا گیا ہے کہ توسیع شدہ روزگار برقرار رکھنے کے ریفنڈ پروگرام کے تحت وہ کمپنیاں جو ملازمین کو فارغ کرنے سے گریز کریں گی یا برطرفیوں کو کم سے کم رکھیں گی، انہیں گزشتہ سال ادا کئے گئے بے روزگاری انشورنس پریمیم کا ریفنڈ بدستور ملتا رہے گا۔
ملازمتوں میں اضافے کے لئے ایک مرتبہ دی جانے والی سبسڈی میں بھی 2026 تک توسیع کر دی گئی ہے۔ ایسے کاروباری ادارے اور سماجی تنظیمیں جو حال ہی میں فارغ التحصیل ہونے والے کالج طلبہ یا 16 سے 24 سال کی عمر کے رجسٹرڈ بے روزگار نوجوانوں کو ملازمت دیں گی انہیں ہر نئے ملازم کے لئے فی کس سبسڈی فراہم کی جائے گی۔
مہارتوں میں بہتری کی سبسڈی کو بھی 2026 تک بڑھا دیا گیا ہے جبکہ اس کے دائرہ کار کو وسیع کرتے ہوئے مزید کارکنوں کو اس سے فائدہ اٹھانے کا اہل بنایا گیا ہے۔
سرکلر میں بے روزگاری انشورنس فنڈ کے خطرات کے موثر انتظام کو مضبوط بنانے اور بے روزگاری الاؤنس اور طبی انشورنس کوریج سمیت بنیادی گزارہ الاؤنسز کی مسلسل فراہمی کو بھی یقینی بنانے پر زور دیا گیا ہے۔