بیجنگ (شِنہوا) چین کے محکمہ موسمیات نے خبردار کیا ہے کہ جولائی کے دوران ملک کے بڑے دریائی خطوں، جن میں دریائے پرل، دریائے یانگسی کے وسطی اور زیریں علاقے، دریائے ہائی حہ اور دریائے سونگ ہوا اور لیاؤ حہ شامل ہیں، میں سیلاب کے خطرات میں اضافے کا امکان ہے۔
قومی موسمیاتی مرکزکے نائب ڈائریکٹر ہوانگ ژو نے ایک پریس کانفرنس میں کہا کہ “جولائی کے اوائل میں دریائے یانگسی کے وسطی اور زیریں علاقوں، یون نان-گوئی ژو سطح مرتفع، چین کے جنوبی اور شمال مشرقی علاقوں میں معمول سے زیادہ بارش ہونے کی توقع ہے۔”
انہوں نے خبردار کیا کہ شدید بارشیں پہاڑی ندی نالوں میں طغیانی، ارضیاتی آفات، چھوٹے اور درمیانے درجے کے دریاؤں میں سیلاب، شہری علاقوں میں پانی جمع ہونے اور زرعی اراضی زیر آب آنے کا باعث بن سکتی ہیں، اس کے پیش نظر انہوں نے حکام اور عوام کو انتہائی چوکنا رہنے کی ہدایت کی۔
جولائی میں 2سے 3 سمندری طوفان چین کے ساحلی علاقوں سے ٹکرانے یا اثر انداز ہونے کا امکان ہے جن سے ملک کے شمالی حصے بھی متاثر ہو سکتے ہیں۔
چین کے بیشتر حصوں میں درجہ حرارت معمول سے زیادہ رہنے کی توقع ہے، اس مہینے کے دوران گرمی کی چار لہروں کی پیش گوئی کی گئی ہے۔ ہوانگ نے عوام کو مشورہ دیا کہ وہ گرمی کے بارے میں جاری ہر انتباہ کو مد نظر رکھیں اور احتیاطی تدابیر اختیار کریں۔