اسلام آباد(نیشنل ٹائمز)وزیر خزانہ محمد اورنگزیب نے کہا کہ ایف بی آر کی ٹیکس وصولیاں مالی سال کے اختتام پر 13 کھرب روپے سے تجاوز کر گئی ہیں جو پاکستان کی تاریخ میں ایک غیر معمولی کامیابی ہے ۔ یہ کامیابی صرف ایک سال کی نہیں بلکہ گزشتہ ڈھائی سال کے مسلسل اصلاحاتی سفر کا نتیجہ ہے ۔ ایف بی آر ہیڈکوارٹرز میں چیئرمین ایف بی آر، بورڈ ارکان، چیف کمشنرز، چیف کلیکٹرز اور دیگر سینئر افسران سے خطاب کرتے ہوئے وزیر خزانہ نے کہا کہ وہ وزیراعظم شہباز شریف کی جانب سے تمام افسران کو ان کی سال بھر کی محنت پر مبارک باد پیش کرتے ہیں جبکہ وزیراعظم جلد ان سے علیحدہ ملاقات بھی کریں گے۔

پاکستان کا مالی خسارہ اب تاریخ کی کم ترین سطح پر جبکہ بنیادی مالی سرپلس بلند ترین سطح پر پہنچ چکا ہے ۔ اگرچہ حکومت نے اخراجات پر بھی قابو پایا، تاہم محصولات میں ریکارڈ اضافے کے بغیر یہ اہداف حاصل کرنا ممکن نہیں تھا۔محمد اورنگزیب نے بتایا کہ گزشتہ مالی سال کے دوران ایف بی آر نے تقریباً 600 ارب روپے کے ٹیکس ریفنڈز جاری کیے جو گزشتہ سال کے مقابلے میں 21 فیصد زیادہ ہیں۔ وزیر خزانہ نے کہا کہ کرپشن، غیر ضروری مداخلت اور سہولت کے نام پر غیر قانونی ادائیگیوں جیسے مسائل کا خاتمہ کرنا ہوگا۔