بیجنگ (شِنہوا) چین کے نائب صدر ہان ژینگ نے منگل کے روز بیجنگ میں سعودی عرب کے وزیر خارجہ شہزادہ فیصل بن فرحان آل سعود سے ملاقات کی۔
ہان نے کہا کہ حالیہ برسوں میں دونوں ممالک کے اعلیٰ رہنماؤں کی تزویراتی رہنمائی میں چین اور سعودی عرب کے تعلقات نے مضبوط اور مثبت پیش رفت برقرار رکھی ہے۔
انہوں نے کہا کہ رواں سال چین اور سعودی عرب کے درمیان جامع تزویراتی شراکت داری کے قیام کی دسویں سالگرہ منائی جا رہی ہے اور چین دونوں ممالک کے رہنماؤں کے درمیان طے پانے والے اہم اتفاق رائے پر عملدرآمد کے لئے سعودی عرب کے ساتھ مل کر کام کرنے، باہمی سیاسی اعتماد کو مزید گہرا کرنے، اعلیٰ سطح کے تبادلوں کو فروغ دینے اور عملی تعاون کو وسعت دینے کا خواہاں ہے تاکہ دوطرفہ تعلقات میں نئی پیش رفت حاصل کی جا سکے۔
ہان نے مزید کہا کہ گلوبل ساؤتھ کے اہم ارکان ہونے کے ناطے چین اور سعودی عرب کو باہمی رابطے اور ہم آہنگی کو مزید مضبوط بنانا چاہیے اور علاقائی و عالمی امن اور استحکام کے فروغ میں اپنا کردار ادا کرنا چاہیے۔
اس موقع پر شہزادہ فیصل نے کہا کہ سعودی عرب اور چین کے درمیان جامع تزویراتی شراکت داری کی ترقی ایک بے مثال بلند سطح پر پہنچ چکی ہے۔ انہوں نے کہا کہ سعودی عرب ایک چین کے اصول پر مضبوطی سے قائم ہے اور چین کے ساتھ مل کر دوطرفہ تعلقات کو مزید آگے بڑھانے کے لئے تیار ہے۔ انہوں نے مزید کہا کہ دونوں ممالک کو کثیرالجہتی شعبوں میں تعاون کو مضبوط بنانا چاہیے اور مشترکہ طور پر علاقائی و عالمی امن اور استحکام کو فروغ دینا چاہیے۔
