بیجنگ (شِنہوا) چین کی جانب سے جاری کردہ ایک ویڈیو کے مطابق شین ژو-23 مشن کے 3 خلاباز ژو یانگ ژو، ژانگ ژی یوآن اور لی جیا ینگ چین کے تیانگ گونگ سپیس سٹیشن میں پہلا مہینہ مکمل کر چکے ہیں۔
چین کے انسان بردار خلائی ادارے (سی ایم ایس اے) کے مطابق ایک ماہ پر محیط اس ’’خلائی سفر‘‘ کی نمایاں جھلک یہ رہی کہ عملے نے مدار میں ایک نیا غذائی تجربہ کیا اور خلائی اوون میں تازہ کدو بیک کیا۔ اتوار کو جاری ہونے والی ویڈیو میں خلابازوں کو کدو کے میٹھے ٹکڑے خلائی اوون میں رکھتے ہوئے دکھایا گیا جس سے خلائی سٹیشن پر گھریلو ماحول کی ایک جھلک نظر آئی۔
گزشتہ ہفتے کے دوران خلاباز مختلف سائنسی تجربات میں مصروف رہے۔ خلائی طب کے شعبے میں انہوں نے الٹراساؤنڈ تشخیصی آلے کے ذریعے ایک دوسرے کی گردن، کلائیوں اور پیٹ کا معائنہ کیا۔ جمع کئے گئے اعداد و شمار خون کی روانی، مائیکرو گریویٹی میں عضلاتی تبدیلیوں اور دیگر طبی تحقیق میں معاون ثابت ہوں گے۔
عملے نے خلائی روبوٹ کے ساتھ بھی تجربات کئے جن میں لمس پر مبنی ٹیسٹ شامل تھے تاکہ مدار میں کام کرنے والے روبوٹس کی حرکات کی منصوبہ بندی کو مزید موثر بنایا جا سکے۔
سی ایم ایس اے کے مطابق مدار میں دماغی برقی سرگرمی (ای ای جی) سے متعلق تحقیق بھی کامیابی سے جاری ہے جس کے دوران خلابازوں نے مختلف روشنی کے حالات میں بصری و حرکی ردعمل اور رویوں کا جائزہ لیا۔
چین نے شین ژو-23 کے عملے کو 24 مئی کو روانہ کیا تھا۔ اس مشن میں مدار میں ایک سالہ قیام کا تجربہ شامل ہے جس سے مستقبل میں طویل دورانیے کی خلائی مہمات کے لئے اہم سائنسی معلومات حاصل ہونے کی توقع ہے۔