کراچی (نیشنل ٹائمز) امریکی حکام کی تحویل سے رہا کیے گئے ایرانی ٹینکر عملے کے مزید 22 افراد کراچی پہنچ گئے، جہاں انہیں ایرانی قونصل خانے کے حوالے کر دیا گیا۔

نائب وزیراعظم و وزیر خارجہ اسحاق ڈار نے اپنے بیان میں بتایا کہ امریکی حکام کی تحویل سے رہائی پانے والے ایرانی شہریوں کی پاکستان آمد کے بعد ان کی دیکھ بھال اور وطن واپسی کے لیے تمام ضروری اقدامات کیے جا رہے ہیں۔

اسحاق ڈار نے کہا کہ ایرانی شہریوں کی بحفاظت وطن واپسی کے انتظامات کو حتمی شکل دی جا رہی ہے، جس کے لیے پاکستان اور ایران کے سفارتی مشنز باہمی تعاون سے کام کر رہے ہیں۔

انہوں نے بتایا کہ متعلقہ حکام کی جانب سے سفری دستاویزات، سفری سہولیات اور دیگر ضروری انتظامات مکمل کیے جا رہے ہیں تاکہ ایرانی شہری جلد از جلد اپنے وطن واپس جا سکیں۔ذرائع کے مطابق کراچی پہنچنے والے تمام 22 ایرانی شہریوں کو ضروری کارروائی کے بعد ایرانی قونصل خانے کے حوالے کر دیا گیا ہے، جہاں سے انہیں ایران روانہ کرنے کے انتظامات جاری ہیں۔