پاراماریبو (شِنہوا) سورینام کے وزیر عوامی تعمیرات و مقامی منصوبہ بندی سٹیفن سانگ نے کہا ہے کہ سورینام بنیادی ڈھانچے، ماحول دوست ترقی، ڈیجیٹل معیشت اور مصنوعی ذہانت کے شعبوں میں چین کے ساتھ تعاون میں اضافے کا خواہاں ہے کیونکہ یہ جنوبی امریکی ملک بڑے پیمانے پر تیل اور گیس کے منصوبوں کی ترقی کے لئے تیاری کر رہا ہے۔
سانگ نے حال ہی میں شِنہوا کو دیئے گئے ایک انٹرویو میں کہا کہ دونوں ملکوں کے پاس ترقی کے مواقع سے فائدہ اٹھانے اور باہمی مفادات کے حصول کے وسیع امکانات موجود ہیں۔
اس سال چین اور سورینام کے درمیان سفارتی تعلقات کی 50 ویں سالگرہ کا ذکر کرتے ہوئے سانگ نے کہا کہ چین ان اولین ممالک میں شامل تھا جنہوں نے سورینام کی آزادی کے بعد اس جنوبی امریکی ملک کے ساتھ سب سے پہلے سفارتی تعلقات قائم کئے۔
انہوں نے کہا کہ گزشتہ نصف صدی کے دوران دوطرفہ تعلقات مسلسل گہرے ہوئے اور تعاون مضبوط ہوا۔
انہوں نے کہا ہم سورینام میں چینی نژاد افراد کی کامیابیوں پر بہت فخر محسوس کرتے ہیں اور چین کی حمایت کے لئے بھی شکر گزار ہیں۔
سانگ کے مطابق سفارتی تعلقات کی 50 ویں سالگرہ نہ صرف دوستی کو یاد کرنے کا ایک اہم لمحہ ہے بلکہ یہ باہمی تعاون کے ایک نئے باب کے آغاز کا موقع بھی فراہم کرتا ہے۔ انہوں نے کہا کہ ہمیں مل کر کام کرنے کی ضرورت ہے۔ یہ ایک مشترکہ مستقبل ہے اور اس سے تمام لوگوں کو فائدہ پہنچنا چاہیے۔