نیروبی (شِنہوا) چین-ہونان فلم ویک کا کینیا کے دارالحکومت نیروبی میں آغاز ہو گیا، جس میں اعلیٰ سرکاری عہدیداران، سفارت کاروں، ماہرین تعلیم، فنکاروں اور فلم کے دلدادہ افراد نے شرکت کی۔ تقریب کا مقصد ثقافتی تبادلوں کو فروغ دینا اور چین اور کینیا کے عوام کے درمیان تعلقات کو مزید مضبوط بنانا تھا۔
تقریب میں تقاریر کے علاوہ مختلف ثقافتی پروگرام پیش کئے گئے جن میں موسیقی، خطاطی، مصوری اور فوٹوگرافی کی نمائشیں شامل تھیں جن میں دونوں ممالک کے درمیان ثقافتی تعاون کو اجاگر کیا گیا۔
کینیا کی وزارت امور نوجوانان، تخلیقی معیشت اور کھیل کے محکمہ فلم سروسز کے ڈائریکٹر نوح اوتیئندے نے کہا کہ یہ فلم ویک فنون لطیفہ کے ذریعے کینیا اور چین کی دوستی اور عوامی روابط میں ایک اہم سنگ میل کی حیثیت رکھتا ہے۔
اوتیئندے کا پیغام محکمہ فلم سروسز کی اسسٹنٹ ڈائریکٹر گریس نگونجیری نے پڑھ کر سنایا۔ انہوں نے کہا کہ ’’یہ فلم ویک محض فلموں کی نمائش کا سلسلہ نہیں ہے بلکہ یہ مکالمے، سیکھنے اور باہمی تعاون کے مواقع فراہم کرتا ہے۔‘‘
اوتیئندے نے کہا کہ یہ فلم ویک کینیا کے ناظرین کو چین کے صوبہ ہونان کے بھرپور ثقافتی ورثے سے روشناس کرانے کے ساتھ ساتھ فلم سازوں، محققین، طلبہ اور صنعت سے وابستہ ماہرین کے درمیان دوطرفہ تعاون کے نئے دروازے بھی کھولتا ہے۔
صوبہ ہونان کی عوامی حکومت کے انفارمیشن آفس کے نائب ڈائریکٹر لو ژینگ ماؤ نے کہا کہ فلمیں چین اور افریقہ کے درمیان دوستی کو گہرا کرنے اور مختلف تہذیبوں کے درمیان باہم سیکھنے کے عمل کو فروغ دینے کا موثر ذریعہ ہیں۔
لو کے مطابق فلم ویک کے دوران کینیا میں 8 چینی فلمیں نمائش کے لئے پیش کی جائیں گی تاکہ فن کے ذریعے ثقافتی تبادلے، باہمی تفہیم اور دوستی کو مزید فروغ دیا جا سکے۔ ان میں ہونان میں تیار کی گئی فلمیں بھی شامل ہیں۔