بیجنگ (شِنہوا) چین 15ویں 5 سالہ منصوبہ (2026-2030) کے دوران شہروں میں تقریباً 7 لاکھ 70 ہزار کلومیٹر طویل زیر زمین پائپ لائنز تعمیر اور اپ گریڈ کرے گا۔
وزارت ہاؤسنگ اور شہری و دیہی ترقی کے عہدیدار چھن شاؤپینگ نے ریاستی کونسل کی پالیسی بریفنگ میں بتایا کہ ملک میں اس وقت تقریباً 39 لاکھ کلومیٹر ایسی پائپ لائنز اور تقریباً 7 ہزار 700 کلومیٹر مربوط یوٹیلیٹی ٹنلز موجود ہیں۔
چھن کے مطابق اس منصوبے میں نکاسی آب اور سیوریج نیٹ ورکس کو بہتر بنا کر سیلابی کنٹرول کو مضبوط بنانا، پانی اور گیس کی پرانی پائپ لائنز کو تبدیل کرنا اور حرارتی نظاموں کو اپ گریڈ کرکے حفاظت اور کارکردگی بہتر بنانا شامل ہے۔
اس کے علاوہ شہری ڈھانچے کے خطرات کے انتظام کے لئے سمارٹ مانیٹرنگ سسٹمز بھی نصب کئے جائیں گے۔
قومی ترقی اور اصلاحاتی کمیشن (این ڈی آر سی) کے عہدیدار گوان پینگ نے بریفنگ میں بتایا کہ این ڈی آر سی اور وزارت نے انتہائی طویل المدت خصوصی ٹریژری بانڈز کے ذریعے زیر زمین پائپ لائن منصوبوں کی بھرپور معاونت کی ہے۔
گوان پینگ نے مزید کہا کہ 2026 میں ان منصوبوں کے لئے مجموعی طور پر 160 ارب یوآن (تقریباً 23.5 ارب امریکی ڈالر) مختص کئے جائیں گے جو گزشتہ سال کے مقابلے میں 25 ارب یوآن زیادہ ہے۔