نوم پنہ (شِنہوا) کمبوڈیا کے وزیر ماحولیات ایانگ سوفالیتھ نے کہا ہے کہ کمبوڈیا عالمی بحری نظم ونسق اور سمندروں کے تحفظ کے لئے بین الاقوامی تعاون میں چین کے فعال کردار کو بہت اہمیت دیتا ہے۔
سمندروں کے عالمی دن سے قبل شِنہوا کو دیئے گئے ایک انٹرویو میں انہوں نے کہا کہ “بڑے بین الاقوامی ماحولیاتی اور سمندری فریم ورک میں چین کی شرکت اس کی بڑھتی ہوئی قیادت اور کثیرالجہتی تعاون، ماحولیاتی تہذیب اور پائیدار ترقی سے وابستگی کو ظاہر کرتی ہے۔”
سوفالیتھ نے کہا کہ کمبوڈیا خاص طور پر قومی دائرۂ اختیار سے باہر حیاتیاتی تنوع سے متعلق معاہدے کی چین کی توثیق کا خیرمقدم کرتا ہے جو قومی حدود سے باہر سمندری حیاتیاتی تنوع کے تحفظ اور اس کے پائیدار استعمال کے لئے عالمی تعاون کو مضبوط بنانے کی جانب ایک اہم سنگ میل ہے۔
انہوں نے کہا کہ چونکہ سمندری ماحولیاتی نظام ایک دوسرے سے جڑے ہوئے ہیں اور سرحدوں سے ماورا نوعیت رکھتے ہیں اس لئے موثر عالمی نظم ونسق اور اجتماعی اقدامات ناگزیر ہیں۔ انہوں نے مزید کہا کہ کمبوڈیا عالمی بحری ماحولیاتی نظم ونسق اور سمندروں کی پائیدار ترقی کو فروغ دینے میں چین کو ایک اہم اور تعمیری شراکت دار سمجھتا ہے۔
وزیر ماحولیات نے کہا کہ “بین الاقوامی تعاون، سائنسی اختراع، ماحولیاتی نظام کی بحالی اور ماحول دوست ترقی کے شعبوں میں چین کی فعال شمولیت نے سمندری ماحولیاتی نظام کے تحفظ کے لئے علاقائی اور عالمی کوششوں میں مثبت کردار ادا کیا ہے۔”