تہران (شِنہوا) ایران کی اسلامی انقلابی گارڈ کور (آئی آر جی سی) نے کہا ہے کہ اس نے ہفتے کے روز کویت اور بحرین میں موجود امریکی فوجی اڈوں پر حملہ کیا جو ایران کے جنوبی علاقے قشم جزیرے اور سیرک کاؤنٹی پر امریکی حملوں کے جواب میں کیا گیا۔
اپنے سرکاری نیوز آؤٹ لیٹ “سپاہ نیوز” پر جاری بیان میں آئی آر جی سی نے کہا کہ نشانہ بنائے گئے امریکی اڈوں میں کویت کا علی السالم ایئر بیس اور بحرین میں امریکی ففتھ فلیٹ کا ہیڈکوارٹر شامل ہیں۔
بیان کے مطابق ہفتے کی صبح مقامی وقت کے مطابق ایک بج کر 30 منٹ پر امریکی فوج کی رہنمائی میں 4 آئل ٹینکروں نے آبنائے ہرمز سے کوئی رابطہ کئے بغیر غیر قانونی طور پر نکلنے کی کوشش کی اور آئی آر جی سی نیوی کے بار بار کے انتباہات کو نظر انداز کیا۔
آئی آر جی سی نے کہا کہ انتباہات کے بعد ایک آئل ٹینکر کو نشانہ بنایا گیا جبکہ ’’قانون کی خلاف ورزی کرنے والے‘‘ باقی جہاز واپس پلٹ گئے۔ بیان کے مطابق اس واقعے کے بعد امریکی ڈرونز نے 2 بج کر 30 منٹ پر قشم جزیرے اور سیرک کاؤنٹی میں مواصلاتی ٹاورز پر حملہ کیا۔
جواب میں آئی آر جی سی کی ایئروسپیس فورس نے فوری طور پر علی السالم ایئر بیس اور امریکی ففتھ فلیٹ ہیڈکوارٹر کی دیگر اہم تنصیبات پر بیلسٹک میزائل فائر کئے۔
امریکی سنٹرل کمانڈ نے سوشل میڈیا پلیٹ فارم ایکس پر پوسٹ میں کہا کہ امریکی افواج نے جمعہ کے روز ایرانی ریڈار کے کچھ مقامات کو نشانہ بنایا۔
کویتی مسلح افواج کے جنرل سٹاف نے کہا کہ کویت کے فضائی دفاعی نظام نے ہفتے کے روز میزائل اور ڈرون حملوں کو روکا۔
بیان میں کہا گیا کہ مختلف علاقوں میں سنے گئے دھماکے دراصل فضائی دفاعی نظام کی جانب سے ’’دشمن کے اہداف‘‘ کو روکنے کا نتیجہ تھے۔
انہوں نے عوام سے اپیل کی کہ وہ متعلقہ حکام کی جانب سے جاری کردہ حفاظتی ہدایات پر عمل کریں۔