بیجنگ (شِنہوا) چائنیز پیپلز لبریشن آرمی (پی ایل اے) کی مشرقی تھیٹر کمانڈ نے کہا ہے کہ اس نے آبنائے تائیوان سے گزرنے کے دوران نیدرلینڈز کے جنگی جہاز ایچ این ایل ایم ایس ڈی روئٹر کی مسلسل نگرانی اور تعاقب کیا۔
کمانڈ کے ترجمان شو چھینگ ہوا نے بتایا کہ مشرقی تھیٹر کمانڈ نے فریگیٹ کی آبنائے تائیوان سے گزرنے کی کارروائی کا موثر انداز میں جواب دیا۔ انہوں نے کہا کہ کمانڈ مسلسل اعلیٰ سطح پر چوکس رہے گی اور چین کی خودمختاری، سلامتی اور خطے میں امن و استحکام کے تحفظ کے لئے پرعزم رہے گی۔
ترجمان کے مطابق آبنائے تائیوان سے گزرنے سے قبل ایچ این ایل ایم ایس ڈی روئٹر نے جنوبی بحیرہ چین میں واقع چین کے شیشا جزائر میں غیرقانونی طور پر داخل ہو کر دراندازی کی اور اپنے جہاز پر موجود ہیلی کاپٹروں کے ذریعے متعدد ایسی پروازیں کیں جو چین کی علاقائی فضائی حدود کی خلاف ورزی تھیں۔