طرابلس (شِنہوا) لیبیا میں اقوام متحدہ کے امدادی مشن (یو این ایس ایم آئی ایل)نے ان الزامات کی تردید کی ہے کہ اقوام متحدہ کے پروگراموں کے تحت لیبیا میں تارکین وطن کو دوبارہ آباد کیا جا رہا ہے اور ایسے دعوؤں کو “مکمل طور پر جھوٹا” قرار دیا ہے۔
یو این ایس ایم آئی ایل کا یہ بیان اس وقت سامنے آیا جب مقامی میڈیا رپورٹس اور عینی شاہدین کے مطابق سینکڑوں لیبیائی مظاہرین نے ملک کے اندر غیر قانونی تارکین وطن کی “آباد کاری” کے حوالے سے اپنے خدشات کا اظہار کرتے ہوئے طرابلس میں اقوام متحدہ کے ہائی کمشنر برائے پناہ گزین (یو این ایچ سی آر) کے دفتر کو بند کروا دیا۔
مشن نے کہا کہ اس نے اپنے ہیڈ کوارٹرز اور یو این ایچ سی آر کے دفتر کے باہر ہونے والے مظاہروں کا نوٹس لیا ہے اور لیبیائی عوام کے درست معلومات تک رسائی اور لیبیائی و بین الاقوامی قوانین کے مطابق پرامن طریقے سے اپنی رائے کا اظہار کرنے کے حق کا اعادہ کیا ہے۔
مشن نے واضح کیا کہ یو این ایچ سی آر سمیت اس کا کوئی بھی ادارہ لیبیا میں تارکین وطن کو دوبارہ آباد کرنے کا کوئی پروگرام نہیں چلا رہا اور اس بات پر زور دیا کہ یہ الزامات بالکل بے بنیاد ہیں۔
یو این ایس ایم آئی ایل کے مطابق یو این ایچ سی آر لیبیائی حکام اور عالمی برادری کے ساتھ مل کر جنگ، تنازعات اور ظلم و ستم سے بھاگنے والے لوگوں کے لئے حل تلاش کرنے کا کام کرتا ہے جس میں حالات سازگار ہونے پر انہیں تیسرے ممالک میں منتقل کرنا اور ان کے آبائی ممالک میں رضاکارانہ واپسی شامل ہے۔