تل ابیب ، بیروت ، میڈرڈ(نیشنل ٹائمز)اسرائیلی وزیراعظم بنیامین نیتن یاہو نے فوج کو غزہ کے 70فیصد علاقے پر قبضہ کرنے کا اعلان کر دیا۔نیتن یاہو نے اپنے بیان میں کہا کہ اس وقت غزہ کا 60 فیصد حصہ اسرائیلی کنٹرول میں ہے جبکہ اسرائیلی افواج جنوبی لبنان میں پیش قدمی کرتے ہوئے دریائے لیطانی عبور کر چکی ہیں اور اہم مقامات پر کارروائیاں جاری ہیں۔ اسرائیلی فوج نے لبنان کی سرحد سے شمال میں تقریباً 40 کلومیٹر تک کے علاقے کو جنگی زون قرار دیتے ہوئے شہریوں کو فوری انخلا کی ہدایت بھی جاری کر دی ہے ۔ دوسری جانب اسرائیلی فوج نے بیروت اور جنوبی لبنان میں شدید بمباری کی، جس کے نتیجے میں دو خواتین سمیت 18 افراد شہید ہوگئے ۔ادھر سپین کے وزیر خارجہ ہوزے مینوئل الباریس نے اسرائیلی اقدام کو عالمی قوانین اور انسانی حقوق کی خلاف ورزی قرار دیتے ہوئے کہا ہے کہ فلسطینیوں اور لبنانیوں کو بھی امن اور آزاد ریاست میں رہنے کا حق حاصل ہے ۔