حیدر آباد (نیشنل ٹائمز)سندھ کے سینئر وزیر شرجیل انعام میمن نے کہا ہے کہ تمام حجاج کرام اور عالم اسلام کو عیدالاضحی کی دلی مبارکباد پیش کرتے ہیں، حضرت ابراہیمؑ کی عظیم قربانی ہمیں یہ درس دیتی ہے کہ اﷲ تعالیٰ کی رضا کی خاطر اپنی جان سے عزیز ہر شے کو قربان کر دینا ہی اصل بندگی ہے ۔ راول ہاؤس راہوکی ٹنڈوجام میں میڈیا سے گفتگو کرتے ہوئے شرجیل میمن نے مزید کہا کہ وزیر اعظم شہباز شریف اور فیلڈ مارشل سید عاصم منیر نے عالمی امن کے قیام کے لیے اہم کردار ادا کیا ہے ۔ ان کا کہنا تھا نفرتوں کا خاتمہ وقت کی اہم ضرورت ہے ، ملک کو بھائی چارے ، رواداری اور باہمی مفاہمت کے جذبے کے ساتھ چلایا جانا چاہیے ۔ایک سوال کے جواب میں انہوں نے کہا 28 ویں ترمیم سے متعلق ہونے والی گفتگو محض قیاس آرائیوں تک محدود ہے اور اس ضمن میں حکومت سے کوئی مشاورت نہیں کی گئی۔

انہوں نے واضح کیا کراچی ہمیشہ سندھ کا حصہ تھا ہے اور رہے گا، بینظیر بھٹو انکم سپورٹ پروگرام ختم نہیں ہوگا کیونکہ اس کے ذریعے غریب و مستحق خواتین کی معاونت کی جاتی ہے ۔ منشیات کے خلاف کارروائیوں کے سوال پرانہوں نے کہا کریک ڈاؤن نہایت سنجیدگی اور موثر انداز میں جاری ہے ، پولیس بھرپور کارروائیاں کر رہی ہے اور میڈیا سے بھی اس حوالے سے تعاون کی اپیل کی گئی ہے تاکہ نوجوان نسل کو اس ناسور سے بچایا جا سکے ۔چیئرمین بلاول بھٹو کی جانب سے شاہراہ بھٹو کے افتتاح کے بعد بعض عناصر کی جانب سے صوبے کی تقسیم سے متعلق بیانات پر انہوں نے کہا کہ ایسے عناصر ترقی اور عوامی فلاح کے منصوبوں کے خلاف ہیں۔پانی ، بجلی اور گیس کے حوالے سے سوال کے جواب میں انہوں نے کہا سندھ کے حالات دیگر صوبوں سے مختلف نوعیت کے ہیں جبکہ بجلی اور گیس کی فراہمی کے مسائل پر مسلسل آواز اٹھائی جا رہی ہے اور وفاقی سطح پر ناانصافی کا سامنا ہے ۔بلدیاتی نظام سے متعلق سوال کے جواب میں انہوں نے کہا وہ جماعتیں بلدیاتی اداروں کو بااختیار بنانے کی بات کرتی ہیں جو خود بلدیاتی انتخابات سے فرار اختیار کرتی رہی ہیں۔