بیجنگ (شِنہوا) چین کے وزیراعظم لی چھیانگ نے بیجنگ میں پاکستان کے وزیراعظم شہباز شریف سے ملاقات کے دوران کہا کہ چین، پاکستان کے ساتھ مل کر چین-پاکستان اقتصادی راہداری (سی پیک) کی تعمیر کو مزید آگے بڑھانے اور دونوں ممالک کے درمیان اہم رابطہ منصوبوں کو فروغ دینے کے لئے تیار ہے۔
لی چھیانگ نے کہا کہ اس سال چین اور پاکستان کے سفارتی تعلقات کے 75 برس مکمل ہو رہے ہیں۔ انہوں نے کہا کہ بدلتی اور غیر یقینی بین الاقوامی صورتحال کے باوجود چین اور پاکستان نے مشترکہ مفادات کے تحفظ اور علاقائی امن میں مثبت پیش رفت کے لئے قریبی رابطے اور ہم آہنگی برقرار رکھی ہے۔
انہوں نے کہا کہ چین ہمیشہ اپنی ہمسایہ سفارتکاری میں پاکستان کے ساتھ تعلقات اور تعاون کو ترجیح دیتا ہے اور پاکستان کے ساتھ مزید قریبی یکجہتی کے ذریعے روایتی دوستی کو آگے بڑھانے، باہمی حمایت مضبوط بنانے، عملی تعاون کو مسلسل وسعت دینے اور چین-پاکستان مشترکہ مستقبل کی حامل برادری کی تعمیر میں مزید بار آور نتائج حاصل کرنے کا خواہاں ہے۔
لی چھیانگ نے کہا کہ چین صنعت، معدنیات، زراعت، عوامی فلاح اور مالیات سمیت مختلف شعبوں میں پاکستان کے ساتھ تعاون مضبوط بنانے، پاکستان سے مزید اعلیٰ معیار کی مصنوعات درآمد کرنے اور دوطرفہ آزاد تجارتی معاہدے کو بہتر بنانے کی خاطر فعال طور پر کام کرنے کے لئے تیار ہے۔
انہوں نے دونوں ممالک پر زور دیا کہ وہ مصنوعی ذہانت، ڈیجیٹل معیشت اور ماحول دوست توانائی جیسے شعبوں میں تعاون کے امکانات تلاش کریں تاکہ مشترکہ طور پر ترقی کے نئے محرکات پیدا کئے جا سکیں۔
لی چھیانگ نے کہا کہ چین انسانی وسائل کی ترقی میں بھی پاکستان کے ساتھ تعاون کو مزید گہرا کرنے کا خواہاں ہے اور زیادہ پاکستانی نوجوان طلبہ کو چین میں تعلیم حاصل کرنے کا خیرمقدم کرتا ہے۔ انہوں نے امید ظاہر کی کہ پاکستان چینی شہریوں، منصوبوں اور اداروں کے تحفظ کے لئے ضروری اقدامات جاری رکھے گا اور محفوظ و مستحکم تعاون کا ماحول فراہم کرے گا۔
شہباز شریف نے کہا کہ چین کے ساتھ تعلقات کا فروغ پاکستان کی خارجہ پالیسی کا بنیادی ستون ہے۔ انہوں نے اس بات پر زور دیا کہ پاکستان ایک چین کے اصول پر قائم ہے اور سنکیانگ، شی زانگ، بحری امور اور تائیوان معاملے سمیت چین کے بنیادی مفادات سے متعلق موقف کی ہمیشہ مضبوط حمایت کرتا آیا ہے۔
انہوں نے کہا کہ پاکستان چین کے ساتھ اعلیٰ سطح کے تبادلوں کو مزید فروغ دینے، مختلف شعبوں میں تعاون بڑھانے اور پاکستان-چین مشترکہ مستقبل کی حامل برادری کو مسلسل آگے بڑھانے کے لئے تیار ہے۔
شہباز شریف نے کہا کہ پاکستان چینی کمپنیوں کی سرمایہ کاری کا خیرمقدم کرتا ہے اور انہیں زیادہ محفوظ اور سازگار کاروباری ماحول فراہم کرنے کے لئے موثر اقدامات جاری رکھے گا۔
انہوں نے مزید کہا کہ پاکستان چین کی جانب سے پیش کردہ چار عالمی اقدامات کی حمایت کرتا ہے اور عالمی و علاقائی امن، استحکام اور ترقی کے فروغ کے لئے چین کے ساتھ قریبی کثیرالجہتی رابطے اور تعاون جاری رکھنے کو تیار ہے۔