بیجنگ (شِنہوا) بیجنگ میں 7 ہزار سے زائد جانداروں کی اقسام ریکارڈ کی گئی ہیں جس نے اس کے حیاتیاتی تنوع کی سطح کو دنیا کے صف اول کے بڑے شہروں میں شامل کر دیا ہے۔
میونسپل ایکولوجی اینڈ انوائرمنٹ بیورو نے بتایا کہ14ویں 5 سالہ منصوبے کے دورانیے (2021-2025) کے دوران شہر کے ماحولیاتی نظام میں مستقل بہتری دیکھی گئی۔ شہر بھر میں کئے جانے والے سروے کے ذریعے مجموعی طور پر 151 اقسام کے قدرتی اور نیم قدرتی ماحولیاتی نظام اور 7 ہزار121 جانداروں کی اقسام کو دستاویزی شکل دی گئی جو حیاتیاتی تنوع کے تحفظ میں شاندار نتائج کو ظاہر کرتی ہیں اور اس معاملے میں بیجنگ کو عالمی بڑے شہروں میں سب سے آگے کھڑا کرتی ہیں۔
بین الاقوامی معیار کے مطابق جس شہر میں 3 ہزار سے 5 ہزار جانداروں کی اقسام ریکارڈ ہوں، وہاں حیاتیاتی تنوع کی سطح کو “اعلیٰ” سمجھا جاتا ہےجبکہ 5 ہزار سے زائد اقسام “انتہائی اعلیٰ” سطح کی عکاسی کرتی ہیں۔
گزشتہ پانچ برسوں کے دوران بیجنگ نے حیاتیاتی تنوع کے تحفظ کو مسلسل فروغ دیا ہے۔ شہر نے بیجنگ کے ماحولیاتی تحفظ کے علاقوں کے تحفظ اور ماحول دوست ترقی کے بارے میں ایک ضابطہ نافذ کیا ہے اور حیاتیاتی تنوع کے تحفظ کے لئے اپنا پہلا درمیانی اور طویل مدتی منصوبہ جاری کیا ہے۔ اہم کاموں پر مختلف محکموں کے درمیان ہم آہنگی پیدا کرنے کے لئے ایک مشترکہ میٹنگ کا نظام بھی قائم کیا گیا ہے۔
شہر نے اپنے زمینی رقبے کے 27.5 فیصد حصے پر ماحولیاتی تحفظ کی ریڈ لائنز مقرر کی ہیں اورتقریباً 19 فیصد رقبے پر محیط قدرتی علاقوں کو محفوظ کیا ہے جس سے حیاتیاتی تنوع کے لئے موثر مقامی تحفظ فراہم ہوا ہے۔