بیجنگ (شِنہوا) چین، امریکہ اور متحدہ عرب امارات (یو اے ای) کے پولیس حکام نے حال ہی میں دبئی میں ٹیلی کام اور آن لائن فراڈ کو نشانہ بناتے ہوئے اپنی پہلی مشترکہ بین الاقوامی قانون نافذ کرنے والی کارروائی انجام دی ہے۔
چین کی وزارت عوامی تحفظ نے بتایا ہے کہ اس مشترکہ کارروائی کے دوران پولیس نے دھوکہ دہی کے 9 اڈوں کو تباہ کیا اور 276 مشتبہ افراد کو گرفتار کر لیا ہے۔
تحقیقات سے معلوم ہوا ہے کہ یہ فراڈ گروہ سوشل میڈیا پلیٹ فارمز کے ذریعے متاثرہ افراد کو جھوٹے رومانوی تعلقات کے جال میں پھنساتے تھے، ان کا اعتماد جیتتے تھے اور پھر انہیں مبینہ طور پر زیادہ منافع دینے والے کرپٹو کرنسی پراجیکٹس میں سرمایہ کاری کا لالچ دے کر دھوکہ دیتے تھے جس سے لوگوں کو شدید مالی نقصان پہنچا۔
وزارت کے ایک اہلکار کے مطابق یہ مشترکہ کارروائی بین الاقوامی قانون نافذ کرنے والے تعاون کو آگے بڑھانے کے لئے چینی پولیس کی کوششوں میں ایک بڑی کامیابی کی عکاسی کرتی ہے۔
اہلکار نے کہا کہ چینی پولیس مزید ممالک کے ساتھ عملی تعاون گہرا کرے گی، مشترکہ کریک ڈاؤن جاری رکھے گی، ٹیلی کام فراڈ کے اڈوں کو مکمل طور پر ختم کرے گی اور ایسے جرائم میں ملوث مشتبہ افراد کو پکڑنے کے لئے ہر ممکن کوشش کرے گی تاکہ تمام ممالک کے عوام کے جائز حقوق اور مفادات کا موثر تحفظ کیا جا سکے۔