ہاربن (شِنہوا) چین کے نائب وزیراعظم ژانگ گوچھنگ نے کہا ہے کہ چین اور روس کے درمیان مختلف شعبوں میں تعاون دونوں ممالک کے سربراہان مملکت کی تزویراتی رہنمائی میں شاندار اور مثبت نتائج حاصل کر رہا ہے۔
ژانگ گوچھنگ جو کمیونسٹ پارٹی آف چائنہ کی مرکزی کمیٹی کے سیاسی بیورو کے رکن بھی ہیں، نے یہ بات چین کے شمال مشرقی صوبے حئی لونگ جیانگ کے دارالحکومت ہاربن میں منعقدہ 10 ویں چین-روس ایکسپو کی افتتاحی تقریب سے خطاب کرتے ہوئے کہی۔
افتتاحی تقریب کے دوران ژانگ گوچھنگ اور روس کے نائب وزیراعظم و صدر کے فار ایسٹرن فیڈرل ڈسٹرکٹ کے خصوصی نمائندے یوری تروتنیف نے دونوں ممالک کے سربراہان کے تہنیتی خطوط بھی پڑھ کر سنائے۔
ژانگ نے کہا کہ چین روس کے ساتھ مل کر دونوں سربراہان کے اہم اتفاق رائے پر عملدرآمد جاری رکھنے، چین-روس نمائش جیسی تقریبات سے بھرپور فائدہ اٹھانے اور دونوں ممالک کے درمیان شمال مشرق-مشرق بعید تعاون کے طریقہ کار کو موثر بنانے کے لئے تیار ہے تاکہ باہمی فائدے اور مشترکہ ترقی کے لئے مزید مواقع پیدا کئے جا سکیں۔
تروتنیف نے کہا کہ روس بین الحکومتی تعاون کے نظام سے بھرپور فائدہ اٹھانے، مقامی سطح پر تعاون کی صلاحیت کو بڑھانے اور دوطرفہ تعلقات کی ترقی کے ثمرات کو مزید وسعت دینے کا خواہاں ہے۔
ژانگ اور تروتنیف نے چین کے شمال مشرقی حصے اور روس کے مشرق بعید کے درمیان تعاون سے متعلق بین الحکومتی کمیشن کے چھٹے اجلاس کی مشترکہ صدارت بھی کی۔