جیوچھوان (شِنہوا) چین نے لی جیان-1وائی 13 کیریئر راکٹ کامیابی سے لانچ کیا جس نے 5 مصنوعی سیاروں کو خلا میں پہنچا دیا۔

راکٹ نے چین کے شمال مغربی ڈونگ فینگ کمرشل سپیس انوویشن پائلٹ زون سے جمعہ کے روز بیجنگ کے وقت کے مطابق دوپہر 12 بج کر 33 منٹ پر اڑان بھری۔ جس نے کامیابی کے ساتھ تمام سیٹلائٹس کو ان کے طے شدہ مداروں میں پہنچا دیا۔

یہ مشن لی جیان-1 کیریئر راکٹ کی 13 ویں پرواز اور لی جیان سیریز کی 14 ویں لانچنگ تھی۔ اب تک لی جیان سیریز کامیابی کے ساتھ مجموعی طور پر 100 سیٹلائٹس خلا میں بھیج چکی ہے جس کے تحت مدار میں پہنچائے گئے پے لوڈز کا مجموعی وزن 18 ٹن سے تجاوز کر چکا ہے۔

کمپنی کے مطابق سی اے ایس سپیس کا تیار کردہ لی جیان-1 ٹھوس ایندھن والا کیریئر راکٹ ہے جو انتہائی تیز رفتار ردعمل کی صلاحیت رکھتا ہے۔ یہ ایک ہمہ گیر پلیٹ فارم پر مبنی ڈیزائن کا حامل ہے جو راکٹ کی باڈی اور مختلف سیٹلائٹ مشنز کے درمیان متنوع مطابقت کو ممکن بناتا ہے۔

اس مشن میں روانہ کی جانے والی تیان یان-27 سیٹلائٹ جسے یوشی بھی کہا جاتا ہے ایک خلائی ڈسپلے سکرین، خلائی نگرانی کے کیمرے، ایک انفراریڈ کیمرے اور آن بورڈ انٹیلی جنٹ پروسیسنگ پے لوڈ سے لیس ہے۔

یہ سیٹلائٹ خلا میں نئی انفراریڈ ریموٹ سینسنگ ٹیکنالوجیز کی تصدیق کرے گی اور ساتھ ہی خلا میں ڈسپلے، سیلفی لینے اور ڈیٹا کی سمارٹ پروسیسنگ جیسے مشنز انجام دے گی۔