ماسکو/کیف (شِنہوا) روس اور یوکرین نے جمعہ کے روز جنگی قیدیوں کا تبادلہ کیا جس کے تحت دونوں ممالک نے 205-205 قیدی ایک دوسرے کے حوالے کئے۔
روس کی وزارت دفاع نے بتایا کہ یوکرین کے زیرِ کنٹرول علاقے سے 205 روسی فوجیوں کو واپس لایا گیا ہے اور اس کے بدلے 205 یوکرینی فوجیوں کو رہا کیا گیا ہے۔
رہائی پانے والے روسی فوجی اس وقت بیلاروس میں موجود ہیں جہاں انہیں طبی اور نفسیاتی امداد فراہم کی جا رہی ہے، اس کے بعد انہیں مزید علاج اور بحالی کے لئے روس منتقل کیا جائے گا۔
وزارت دفاع نے بتایا کہ اس تبادلے میں متحدہ عرب امارات نے انسانی ہمدردی کی بنیاد پر ثالث کا کردار ادا کیا۔
یوکرینی صدر وولودیمیر زیلنسکی نے ٹیلی گرام پر لکھا کہ یوکرینی مسلح افواج، نیشنل گارڈ اور اسٹیٹ بارڈر گارڈ سروس کے 205 فوجی اپنے وطن واپس پہنچ گئے ہیں۔
اس ماہ کے آغاز میں یوکرین اور روس نے امریکہ کی ثالثی میں جاری مذاکراتی عمل کے تحت ایک ہزار-ایک ہزار قیدیوں کے تبادلے پر اتفاق کیا تھا۔