بیجنگ (شِنہوا) چین-یورپ ریلوے ایکسپریس نے ہفتے کے روز اپنے ایک لاکھ 30 ہزار سفری دورے مکمل کر لئے۔ اس موقع پر چین کے وسطی صوبے ہینان کے دارالحکومت ژینگ ژو سے جرمنی کے شہر ہیمبرگ جانے والی مال بردار ٹرین مقامی وقت کے مطابق صبح 10 بجے روانہ ہوئی۔
چائنہ سٹیٹ ریلوے گروپ کمپنی لمیٹڈ کے مطابق اس سروس کے ذریعے منتقل کئے گئے سامان کی مجموعی مالیت 520 ارب امریکی ڈالر سے تجاوز کر چکی ہے۔
کمپنی کا کہنا ہے کہ گزشتہ برسوں کے دوران چین-یورپ ریلوے ایکسپریس کے آپریشنل روٹس کو مسلسل بہتر بنایا گیا ہے جبکہ 120 کلومیٹر فی گھنٹہ کی ڈیزائن رفتار کے ساتھ 93 مقررہ روٹس قائم کئے گئے ہیں۔
اس وقت چین کے 129 شہر چین-یورپ ریلوے ایکسپریس سروس چلا رہے ہیں، جو یورپ کے 26 ممالک کے 235 شہروں اور ایشیا کے 11 ممالک کے 100 سے زائد شہروں کو آپس میں ملاتے ہیں، یوں یہ نیٹ ورک یوریشیا کے بیشتر حصے کا احاطہ کرتا ہے۔
اس سروس کے آغاز کے بعد مال برداری کے کرایوں میں 40 فیصد سے زیادہ کمی آئی ہے۔ اب یہ ٹرینیں 53 مختلف زمروں میں شامل 50 ہزار سے زائد اقسام کی اشیاء منتقل کر رہی ہیں۔ اہم برآمدی اشیا میں گاڑیاں اور ان کے پرزے، مشینری، الیکٹرانکس اور برقی آلات جیسے قیمتی مصنوعات شامل ہیں، جبکہ یورپ سے چین آنے والی درآمدات میں لکڑی، کاغذی خام مال، خصوصی زرعی مصنوعات اور روزمرہ استعمال کی اشیاء شامل ہیں۔