واشنگٹن (شِنہوا) آبنائے ہرمز میں بڑھتی ہوئی کشیدگی کے دوران امریکی افواج نے خلیج عمان میں ایرانی بندرگاہ میں داخل ہونے سے قبل ایران کے مزید 2 خالی تیل بردار جہازوں کو نشانہ بنا کر ناکارہ بنا دیا۔
امریکی سنٹرل کمانڈ نے سوشل میڈیا پلیٹ فارم ایکس پر ایک بیان میں کہا کہ اس نے ’’خلیج عمان میں ایرانی بندرگاہ کی طرف جانے کی کوشش کرنے والے ایران کے 2 خالی تیل بردار جہازوں کے خلاف ناکہ بندی کے اقدامات کئے۔‘‘
سینٹ کام کے مطابق یو ایس ایس جارج ایچ ڈبلیو بش طیارہ بردار بحری جہاز سے اڑ کر امریکی بحریہ کے ’’ایف/اے-18 سپر ہارنیٹ‘‘ جنگی طیارے نے دونوں جہازوں کی چمنیوں پر اسلحے سے درست نشانہ باندھ کر انہیں ناکارہ بنا دیا۔
بدھ کے روز بھی امریکی افواج نے حسنہ نامی ایران کے خالی تیل بردار جہاز کو اس وقت ناکارہ بنایا تھا جب وہ خلیج عمان میں ایک ایرانی بندرگاہ کی جانب جا رہا تھا۔ یو ایس ایس ابراہم لنکن طیارہ بردار بحری جہاز سے اڑنے والے ایف/اے-18 سپر ہارنیٹ طیارے نے جہاز کا رخ موڑنے والے حصے کو ناکارہ بنانے کے لئے 20 ملی میٹر توپ سے کئی گولیاں فائر کیں۔
کمانڈ نے کہا کہ ’’تینوں جہاز اب ایران کی جانب سفر نہیں کر رہے۔‘‘
ایک اور بیان میں سنٹرل کمانڈ نے کہا کہ اس وقت 70 سے زائد تیل بردار جہاز ایسے ہیں جنہیں امریکی افواج ایرانی بندرگاہوں میں داخل ہونے یا وہاں سے نکلنے سے روک رہی ہیں۔ بیان کے مطابق یہ تجارتی جہاز 16 کروڑ 60 لاکھ سے زائد بیرل ایرانی تیل منتقل کرنے کی صلاحیت رکھتے ہیں جس کی مالیت 13 ارب امریکی ڈالر سے زیادہ بنتی ہے۔