لاس اینجلس (شِنہوا) چین کے ہانگ کانگ کی کرائم تھرلر فلم ’’سرد جنگ 1994‘‘ شمالی امریکہ میں محدود سینما نمائش کے ساتھ پیش کردی گئی۔
یہ فلم طویل عرصے سے جاری پولیس تھرلر سلسلے ’’سرد جنگ‘‘ کا ابتدائی حصہ ہے، جس کی کہانی 1997 میں ہانگ کانگ کی مادر وطن میں واپسی سے قبل کے دور میں پیش آتی ہے۔ ایک اہم اغوا کا واقعہ برطانوی حکام، پولیس، بااثر کاروباری شخصیات اور جرائم پیشہ گروہوں کو اقتدار کی کشمکش میں الجھا دیتا ہے، جس سے اس فلمی سلسلے کے سیاسی اور ادارہ جاتی پس منظر میں مزید گہرائی پیدا ہوتی ہے۔
فلم کی ہدایت کاری لانگ مین لیونگ نے کی ہے جبکہ اس میں چھو یون فات، ایرون کوک اور ٹونی لیونگ کا فائی اپنے سابقہ کردار دوبارہ ادا کر رہے ہیں۔
سی ایم سی پکچرز اس فلم کو لاس اینجلس، سان فرانسسکو، نیویارک، فلاڈیلفیا، آسٹن، ہیوسٹن، اورلینڈو، ٹورنٹو اور وینکوور سمیت شمالی امریکہ کے 70 سے زائد منتخب سینما گھروں میں پیش کر رہا ہے جہاں بڑی تعداد میں بیرون ملک چینی آباد ہیں۔ فلم کینٹونیز بولی میں پیش کی گئی ہے جبکہ اس کے ساتھ انگریزی اور چینی زبان میں ذیلی تحریریں بھی شامل ہیں۔
ٹکٹوں کی فروخت کے پلیٹ فارم ماؤیان کے مطابق ’’سرد جنگ 1994‘‘ نے چینی مین لینڈ میں یوم مئی کی تعطیلات کے پہلے دن نمائش کے بعد سے تقریباً 22 کروڑ 50 لاکھ یوآن (تقریباً 3 کروڑ 30 لاکھ امریکی ڈالر) کا کاروبار کیا ہے۔