بیجنگ (شِنہوا) چینی قانون ساز ایک نئے قانون کے مسودے کو آگے بڑھا رہے ہیں جس کا مقصد بنیادی طرز زندگی کے لئے فراہم کی جانے والی معاونت کو مستحکم کرنا اور کمزور طبقات کے لئے ایک مضبوط سماجی تحفظ کا نظام تیار کرنا ہے۔
سماجی امداد سے متعلق اس قانون کے مسودے میں طریقہ کار کو عملی ضروریات کے مطابق ڈھالنے اور عوام کے لئے امداد تک رسائی کو مزید آسان اور سہل بنانے پر زور دیا گیا ہے۔
یہ مسودہ قومی مقننہ، قومی عوامی کانگریس کی قائمہ کمیٹی کے جاری اجلاس میں تیسری خواندگی کے لئے پیش کیا گیا۔
مسودے میں ایک نئی شق شامل کی گئی ہے جس کا مقصد امداد کے لئے درخواست گزار خاندانوں کی مالی تصدیق کے نظام کو بہتر بنانا اور اہلیت کے تعین اور منظوری کے عمل کو مزید تیز اور موثر بنانا ہے۔
مسودے میں تمام سطح کی حکومتوں پر زور دیا گیا ہے کہ وہ سماجی امداد حاصل کرنے والے ایسے افراد جو کام کرنے کی صلاحیت رکھتے ہیں، ان کی حوصلہ افزائی اور رہنمائی کریں تاکہ وہ خود انحصاری حاصل کر سکیں اور خود کو مشکلات سے نکال سکیں۔
سماجی امداد کی اہمیت کو ایک حفاظتی جال اور ہنگامی امدادی نظام کے طور پر اجاگر کرتے ہوئے مسودے میں یہ شرط رکھی گئی ہے کہ جب بھی مستحقین کو کسی ہنگامی صورتحال کا سامنا ہو حکام کو فوری طور پر امداد فراہم کرنی چاہیے۔