اسلام آباد(نیشنل ٹائمز)سپریم کورٹ نے چار مرلہ زمین کے تنازع پر باپ کو قتل کرنے والے ملزم کی رہائی کے کیس میں قانونی نکات اٹھاتے ہوئے ریمارکس دیئے کہ ایک قتل پر 15 سال قید کاٹنے کے بعد ملزم کاباہر آنا ایسے ہے جیسے اسے قتل کا لائسنس دیا جائے جبکہ صلح کے مثبت اثرات بھی ہو سکتے ہیں۔ جسٹس ہاشم کاکڑ کی سربراہی میں تین رکنی بینچ نے سماعت کی، عدالت نے خواجہ حارث اور شاہ خاور کو بطور عدالتی معاونین تحریری رپورٹ جمع کرانے کی ہدایت دی۔ مجرم کے وکیل نے دلائل دیئے کہ میرا موکل فساد فی الارض کے زمرے میں نہیں آتا اور دماغ کی خرابی کا پہلو بھی ہو سکتا ہے ۔ جسٹس ہاشم کاکڑ نے کہا “دماغ کی خرابی تھی تو وہ خود کو گولی مار لیتا یا چھت سے چھلانگ لگا لیتا، والد کو قتل کرنا دماغ کی خرابی کیسے ہو سکتی ہے ؟ جسٹس اشتیاق ابراہیم اور جسٹس صلاح الدین پنہور نے بھی دلائل پر سخت سوالات کیے اور کہا ملزم کو وراثت میں حصہ نہیں ملے گا، نہ ہی بریت کا ٹیگ مل سکتا ہے ۔ عدالت نے سماعت 20 اپریل تک ملتوی کر دی۔ ادھر ساس کو قتل کرنے والے داماد کی سزا کے خلاف اپیل کی سماعت کے دوران جسٹس ہاشم کاکڑ کے پر استفسارپروکیل صفائی نے کہا میرے موکل پر ساس کو قتل کرنے کا الزام ہے ۔بیوی ناراض ہو کر سسرال میں بیٹھی تھی، میرا موکل بیوی کو منانے کے لیے اسلحہ ساتھ لے کر گیا۔ جسٹس صلاح الدین پنہور نے ریمارکس دیئے کہ بیوی کو منانے کا یہ طریقہ کیا ہے ؟ جسٹس اشتیاق ابراہیم نے استفسار کیا کہ اسلحہ لے کر جانا مناسب طریقہ ہے ؟ وکیل نے موقف اختیارکیا کہ سسر نے اپنی بیوی کو مارا اور الزام داماد پر لگا دیا گیا۔ جسٹس ہاشم کاکڑ نے وکیل سے کہا آپ بہت ہی معصوم ہیں۔ عدالت نے مزید سماعت ملتوی کر دی۔ علاوہ ازیں فوجداری کیس میں مقتول کے یتیم بچوں یا بیوہ کو بطور قصاص جائیداد کی منتقلی پر ٹیکس استثنیٰ دینے کے نکتے پر بحث کیلئے سماعت ملتوی کر دی گئی۔