اسلام آباد(نیشنل ٹائمز)امریکا ایران جنگ بندی کے حوالے سے وفاقی وزرا نے اپنے ردعمل میں کہا کہ پاکستان دنیا کی بہت بڑی جنگ رکوانے میں
کامیاب ہوا ، مودی فارغ ہوگیا، اس کے پلے کچھ نہیں رہا، بھارتی میڈیا اب تڑپتا رہے گا۔پارلیمنٹ ہاؤس کے باہر میڈیا سے گفتگو میں خواجہ آصف نے کہا کہ سب کو بہت بہت مبارک ہو، اللہ نے پاکستان کو دنیا بھر میں عزت دی، پاکستان کو بااعتماد ثالث کے طور پر خطے اور پوری دنیا میں تسلیم کیا گیا ،عالمی طاقت امریکا سمیت پوری دنیا کی نظریں پاکستان پر مرکوز ہیں ۔ مودی فارغ ہوگیا، مودی کے پلے اب کچھ بھی نہیں رہا ،فیلڈ مارشل عاصم منیر اور وزیراعظم شہبازشریف کی جنگ بندی کے حوالے سے کوششیں رنگ لے آئیں، سول اور عسکری قیادت پر مشتمل ہائبرڈ ماڈل نے دو تین سال میں بے پناہ کامیابیاں سمیٹیں، بھارتی میڈیا اب تڑپتا رہے گا ۔وفاقی وزیر ڈاکٹر مصدق ملک نے کہا کہ پاکستان امن اور علاقائی و عالمی استحکام کے لئے اپنے غیر متزلزل عزم پر قائم ہے ، میں وزیر اعظم اورفیلڈ مارشل کے پختہ عزم کو سراہتا ہوں ، وفاقی وزیر رانا تنویر حسین نے ایران جنگ بندی کے حوالے سے جاری اپنے پیغام میں کہاکہ وزیراعظم کی دور اندیش قیادت میں پاکستان نے عالمی سفارتکاری میں مؤثر اور باوقار کردار ادا کیا ، وفاقی وزیر قیصر احمد شیخ نے ایران امریکہ جنگ بندی پر وزیرِ اعظم شہباز شریف اور فیلڈ مارشل عاصم منیر کو خراجِ تحسین پیش کرتے ہوئے کہاکہ پاکستان نے بروقت اور مؤثر سفارتکاری کے ذریعے خطے کو بڑے بحران سے بچایا ۔ پاکستان کی کاوشیں عالمی اعتراف کی مستحق ہیں ، وفاقی وزیر قومی ورثہ و ثقافت اورنگزیب خان کھچی نے کہا کہ ایران امریکہ جنگ بندی پر وزیرِ اعظم اور فیلڈ مارشل کی قیادت قابلِ تحسین ہے ، پاکستان نے خطے کو ممکنہ تباہی سے بچانے میں اہم کردار ادا کیا ہے ۔