لاہور (نیشنل ٹائمز) امیر جماعت اسلامی حافظ نعیم الرحمن نے امریکا، اسرائیل اور ایران کے درمیان جنگ بندی معاہدے پر ایرانی قیادت اور قوم کے عزم و استقامت کو خراج تحسین پیش کیا ہے اور قیام امن کیلئے حکومت پاکستان کی کاوشوں کو سراہا ہے ۔منصورہ سے جاری ویڈیو پیغام میں انہوں نے کہا کہ امریکا اور اسرائیل نے عالمی قوانین کو پامال کرتے ہوئے ایران پر حملے کیے اور اس کے ایٹمی و میزائل پروگرام کو تباہ کرنے کے دعوے کیے ، مگر وہ ناکام رہے ۔ چھ ہفتوں کی جنگ کے بعد ہونے والی عارضی جنگ بندی دراصل آبنائے ہرمز کھولنے سے مشروط ہے ، جو ایران کی کامیابی ہے ۔حافظ نعیم الرحمن نے اس عمل میں پاکستان کے کردار کو سراہتے ہوئے کہا کہ حکومت نے خلیجی صورتحال کو بگڑنے سے بچایا اور سعودی عرب کے ساتھ دفاعی معاہدہ برقرار رکھتے ہوئے تہران اور ریاض کے تعلقات کو متوازن رکھا۔ حالیہ جنگ سے واضح ہوگیا کہ امریکا میں جمہوریت برائے نام ہے اور وہ اسرائیل کے زیر اثر ہے ۔ عالمی سطح پر امریکی اجارہ داری کمزور ہوچکی ہے اور اسے اخلاقی، سفارتی اور فوجی شکست کا سامنا ہے ۔ انہوں نے زور دیا کہ پاکستان کو آئندہ حالات میں غیر جانبدار سفارتکاری اپناتے ہوئے ایران سے توانائی معاہدے اور خلیجی ممالک سے تعلقات کو متوازن رکھنا ہوگا۔ ساتھ ہی چین اور روس کے ساتھ مل کر خطے میں ایک مضبوط بلاک کے قیام کی ضرورت ہے ۔