اسلام آباد (نیشنل ٹائمز) پاکستان کی سکیورٹی فورسز نے افغانستان سے حملوں کے جواب میں کئے گئے آپریشن غضب للحق کے دوران موثر کارروائیاں کرتے ہوئے دراندازی کی کوششوں کو ناکام بنا دیا، جبکہ افغان ذرائع ابلاغ میں بھی سرحدی علاقوں میں جھڑپوں اور پسپائی سے متعلق رپورٹس سامنے آئی ہیں۔سکیورٹی ذرائع کے مطابق فورسز نے بروقت اور بھرپور جواب دے کر سرحدی سلامتی کو یقینی بنایا اور کسی بھی ممکنہ پیش قدمی کو روک دیا ،افغان میڈیا ادارے افغانستان انٹرنیشنل کی رپورٹس میں دعوی ٰکیا گیا ہے کہ حالیہ جھڑپوں کے بعد نورستان اور کنڑ کے سرحدی علاقوں میں کشیدگی بڑھی اور بعض چوکیوں سے پسپائی کی اطلاعات موصول ہوئیں،مقامی سطح پر نقل و حرکت میں کمی اور حفاظتی اقدامات دیکھنے میں آئے ، قبائلی عمائدین اور مقامی ذرائع کے مطابق سرحدی علاقوں میں سکیورٹی خدشات برقرار ہیں اور عوام کو مشکلات کا سامنا ہے ، ماہرین کے مطابق موجودہ صورتحال اس امر کی عکاس ہے کہ خطے میں سکیورٹی چیلنجز بدستور موجود ہیں،کسی بھی مہم جوئی کا موثر جواب دینے کی صلاحیت برقرار رکھی جا رہی ہے ،دفاعی تجزیہ کاروں کا کہنا ہے کہ پاکستان کی جانب سے بروقت ردعمل اور ہدفی کارروائیاں نشاندہی کرتی ہیں کہ اپنی سرحدی خودمختاری اور سلامتی پر کسی قسم کا سمجھوتہ نہیں کیا جائے گا ۔