چھونگ چھنگ (شِنہوا) چین کی جنوب مغربی چھونگ چھنگ بلدیہ میں ٹیسلا کے الیکٹرک گاڑیوں (ای وی) کے 55 سپر چارجنگ سٹیشنز فعال کر دیئے گئے۔ یہ منصوبہ چین میں امریکی کار ساز کمپنی کی جانب سے تعمیر کئے گئے سروس ایریاز میں سپر چارجنگ سٹیشنز کی سب سے بڑی تعداد پر مشتمل واحد منصوبہ ہے۔
یہ 55 وی فور سپر چارجنگ سٹیشنز، جن میں مجموعی طور پر 212 چارجنگ پائلز شامل ہیں، چھونگ چھنگ کے مرکزی شہری علاقے کے گرد اہم ٹرانسپورٹ مراکز کے ساتھ ساتھ اس کے ہائی وے نیٹ ورک کے شمال مشرقی اور جنوب مشرقی حصوں میں واقع ہیں۔
اوسطاً ہر گھنٹے کی ڈرائیونگ کے فاصلے پر ایک سروس ایریا میں ایک سپر چارجنگ سٹیشن دستیاب ہے، جو ای وی مالکان کے لئے چھونگ چھنگ کے اندر اور قریبی صوبوں جیسےسیچھوان، ہوبے، ہونان، شانشی اور گوئی ژو تک سفر کو مزید ہموار بناتا ہے۔
چھونگ چھنگ کے 10 قومی ایکسپریس ویز کے حصوں پر محیط وسیع ای وی چارجنگ نیٹ ورک ٹیسلا کے لئے مضبوط چارجنگ انفراسٹرکچر کی تعمیر میں ایک سنگ میل سمجھا جا رہا ہے۔ یہ اپنے حجم، چارجنگ پائلز کی تعداد، تعمیراتی رفتار اور وسیع اثرات کے باعث نمایاں ہے، جبکہ یہ چارجنگ پائلز غیر ٹیسلا گاڑیوں کے لئے بھی قابل استعمال ہیں۔
2025 سے ٹیسلا نے چینی مین لینڈ میں وی فور سپر چارجرز متعارف کرانے کا منصوبہ بنایا، جہاں مارچ 2026 تک اس نے 2 ہزار 500 سے زائد سپر چارجنگ سٹیشنز اور 12 ہزار سے زیادہ چارجنگ پائلز نصب اور فعال کئے ہیں۔
چین کے مغربی علاقے کے لئے ٹیسلا کے جنرل منیجر ہوانگ لی نے کہا کہ چھونگ چھنگ کے ایکسپریس وے سروس ایریاز میں ان سپر چارجنگ سٹیشنز کا آغاز چینی مارکیٹ میں اپنی موجودگی کو مزید گہرا کرنے کے لئے ٹیسلا کے اعتماد کو ظاہر کرتا ہے اور مزید صوبوں اور شہروں تک ایسے منصوبوں کی توسیع کے لئے مضبوط بنیاد فراہم کرتا ہے۔