نیو یارک (شِنہوا) امریکی وزیر خزانہ سکاٹ بیسنٹ نے کہا ہے کہ امریکہ ایران پر فوجی حملوں کے نتیجے میں بڑھتی ہوئی توانائی کی قیمتوں کے پیش نظر زیر ترسیل ایرانی تیل پر عائد پابندیاں اٹھا سکتا ہے۔
فاکس بزنس کو دیئے گئے ایک انٹرویو میں امریکی وزیر خزانہ نے کہا کہ اس اقدام سے تقریباً 14 کروڑ بیرل تیل مارکیٹ میں آ سکتا ہے۔
انہوں نے کہا کہ بنیادی طور پر ہم اگلے 10 سے 14 دنوں تک قیمتیں کم رکھنے کے لئے ایرانی تیل کو ہی ایران کے خلاف استعمال کریں گے جب تک ہم اس مہم کو جاری رکھتے ہیں۔
گزشتہ ہفتے امریکہ نے عارضی طور پر سمندر میں موجود روسی تیل کی فروخت پر عائد پابندیاں بھی نرم کر دی تھیں اور یہ نرمی 11 اپریل تک برقرار رہے گی۔
بیسنٹ کے مطابق اس اقدام سے عالمی منڈی میں 13 کروڑ بیرل تیل کی فراہمی ممکن ہوئی ہے۔
امریکی صدر ڈونلڈ ٹرمپ نے تیل کے تزویراتی ذخائر سے تیل جاری کرنے کا حکم دیا ہے اور کیلیفورنیا کے ساحل کے قریب تیل کی پیداوار بڑھانے کے اقدامات بھی کئے ہیں۔