ماسکو (شِنہوا) روسی وزارت خارجہ نے خلیج فارس کی موجودہ صورتحال پر جاری ایک بیان میں کہا ہے کہ ایران کے خلاف امریکہ اور اسرائیل کی بلااشتعال جارحیت کے نتیجے میں پیدا ہونے والی مخاصمت کو فوری طور پر ختم کیا جائے۔
وزارت نے کہا کہ روس مستقل طور پر اس بات کی حمایت کرتا ہے کہ دوست عرب ممالک اور ایران کے درمیان پرامن، محفوظ اور خوشگوار ہمسائیگی پر مبنی بقائے باہمی کے لئے حالات پیدا کئے جائیں۔
بیان میں کہا گیا کہ ہم اس بات پر زور دیتے ہیں کہ اس سمت میں پہلا قدم امریکہ اور اسرائیل کی جانب سے اپنی عسکری مہم جوئی سے فوری دستبرداری ہونا چاہیے۔
وزارت نے اس بات کا اعادہ کیا کہ روس تنازع کے حل اور موجودہ اختلافات کے خاتمے کے لئے سیاسی اور سفارتی ذرائع سے معاونت فراہم کرنے کو تیار ہے تاکہ خطے میں طویل المدتی اور پائیدار استحکام حاصل کیا جا سکے اور اس عمل میں وہاں موجود تمام ممالک کے مفادات کو مدنظر رکھا جائے۔
بیان میں مزید کہا گیا کہ ہم مشرق وسطیٰ میں تنازع کے حل اور موجودہ اختلافات کو سیاسی و سفارتی ذرائع سے ختم کرنے کے لئے تعمیری تعاون جاری رکھنے کے لئے تیار ہیں، جس میں اس امر کو یقینی بنانا بھی شامل ہے کہ خطے کے تمام ممالک کے جائز مفادات میں توازن قائم رکھتے ہوئے ایک پائیدار حل تلاش کیا جائے۔