بیجنگ (شِنہوا) چین نے ایشیا-بحرالکاہل خطے میں توانائی کے تعاون کو فروغ دینے کے لئے تین تجاویز پیش کی ہیں، جن میں اعلیٰ معیار کی ہمہ گیر توانائی تک رسائی، مصنوعی ذہانت (اے آئی) کے ذریعے توانائی اور مربوط توانائی کا انتظام شامل ہیں۔
یہ تجاویز چین کے مشرقی صوبے جیانگشی کے شہر نان چھانگ میں بدھ سے جمعرات تک ہونے والے 71 ویں ایشیا-بحرالکاہل اقتصادی تعاون (اپیک) کے توانائی کے متعلق ورکنگ گروپ کے اجلاس میں پیش کی گئیں۔
ان تجاویز میں جامع ترقی پر زور دیا گیا ہے تاکہ علاقائی تعاون اور متنوع ٹیکنالوجیز کے ذریعے توانائی کے فوائد سب تک پہنچائے جا سکیں۔ اس کے علاوہ تیز رفتار جدت کی حوصلہ افزائی کی گئی ہے تاکہ مشترکہ حکمت عملیوں اور معیارات کے ذریعے اے آئی اور توانائی کو مربوط کیا جا سکے۔ مزید یہ کہ توانائی کی نظم ونسق کی اثرانگیزی، شفافیت اور لچک کو بہتر بنانے کے لئے پالیسی مکالمے اور معلومات کے تبادلے کے ذریعے بہتر ہم آہنگی پر زور دیا گیا ہے۔
چین کی قومی توانائی انتظامیہ کے نائب سربراہ حہ یانگ نے اس بات پر زور دیا کہ ایشیا- بحرالکاہل خطہ عالمی توانائی کے استعمال کا ایک اہم مرکز اور توانائی کی عالمی پیداوار اور تبدیلی کا ذریعہ ہے۔
انہوں نے کہا کہ چین ایشیا-بحرالکاہل خطے میں محفوظ، لچکدار اور قابل استطاعت توانائی نظام کی تعمیر کو فروغ دینے اور خطے اور دنیا میں توانائی کی سلامتی، استحکام اور پائیدار ترقی کے لئے چینی دانش اور حل فراہم کرنے کے لئے پرعزم ہے۔