بیجنگ (شِنہوا) چین کے نائب وزیراعظم حہ لی فینگ نے کہا ہے کہ 15 ویں پانچ سالہ منصوبے (2026-2030) کے دوران چین غیر متزلزل طور پر اعلیٰ سطح کے کھلے پن کو وسعت دے گا اور اعلیٰ معیار کی ترقی کو فروغ دے گا جو کثیر القومی کمپنیوں کے لئے مارکیٹ کے وسیع تر مواقع پیدا کرے گا۔
کمیونسٹ پارٹی آف چائنہ کی مرکزی کمیٹی کے سیاسی بیورو کے رکن حہ لی فینگ نے ان خیالات کا اظہار معروف کثیر القومی کمپنیوں کے سینئر نمائندوں سے بیجنگ میں ملاقات کے دوران کیا۔ ان کمپنیوں میں ایچ ایس بی سی ، یو بی ایس، لوئس ڈریفس، سیمنز ہیلتھینیرز، شنائیڈر الیکٹرک، ریو ٹنٹو، پروڈنشل، انویسٹر اے بی، سٹینڈرڈ چارٹرڈ، سوزانو اور ٹی سی پی گروپ شامل تھے۔
انہوں نے اس بات پر زور دیا کہ چین کی معیشت مجموعی استحکام برقرار رکھتے ہوئے ترقی کر رہی ہے اور اختراع پر مبنی اعلیٰ معیار کی ترقی کی جانب بڑھ رہی ہے۔ انہوں نے مزید کہا کہ چین کثیر القومی کمپنیوں کو خوش آمدید کہتا ہے کہ وہ چین میں اپنی سرمایہ کاری میں اضافہ کریں اور مفید تعاون کو مسلسل گہرا کریں۔
کثیر القومی کمپنیوں کے نمائندوں نے چین کی معیشت پر اعتماد کا اظہار کیا اور چینی مارکیٹ کو مزید تلاش کرنے اور وہاں سرمایہ کاری کو وسعت دینے کے لئے اپنی آمادگی کا اعادہ کیا۔