بیجنگ (شِنہوا) چین میں الیکٹرک گاڑیوں (ای وی) کی چارجنگ تنصیبات میں تیزی سے توسیع کا سلسلہ جاری ہے اور فروری 2026 کے آخر تک چارجنگ پوائنٹس کی مجموعی تعداد 2 کروڑ 10 لاکھ 10 ہزارتک پہنچ گئی ہے جو گزشتہ سال کے مقابلے میں 47.8 فیصد اضافہ ہے۔
قومی توانائی انتظامیہ کے مطابق اس مجموعی تعداد میں سے عوامی چارجنگ کی سہولیات کی تعداد 48 لاکھ 34 ہزار رہی، جو ایک سال پہلے کے مقابلے میں 28.8 فیصد زیادہ ہے۔
نجی چارجنگ کی سہولیات کی تعداد گزشتہ ماہ کے آخر تک مجموعی طور پر ایک کروڑ 61 لاکھ 76 ہزار یونٹس رہی جس میں گزشتہ سال کی نسبت 54.6 فیصد کا بڑا اضافہ دیکھا گیا جو رہائشی علاقوں میں چارجنگ کی بڑھتی ہوئی طلب کی عکاسی کرتا ہے۔
قومی چارجنگ انفراسٹرکچر مانیٹرنگ اینڈ سروس پلیٹ فارم سے حاصل کردہ یہ اعداد و شمار الیکٹرک گاڑیوں کی فروخت میں اضافے کے ساتھ ساتھ چین کے ای وی سپورٹ نیٹ ورک کی مسلسل توسیع کو نمایاں کرتے ہیں۔
چائنہ ایسوسی ایشن آف آٹوموبائل مینوفیکچررز کے اعداد و شمار کے مطابق 2025 کے دوران چین کے ای وی سیکٹر میں ترقی کی رفتار تیز رہی جہاں پیداوار اور فروخت بالترتیب ایک کروڑ 66 لاکھ 26 ہزار اور ایک کروڑ 64 لاکھ 90 ہزار یونٹس رہی، جس میں گزشتہ سال کی نسبت بالترتیب 29 فیصد اور 28.2 فیصد اضافہ ہوا۔
اکتوبر 2025 میں چین نے ملک کے ای وی چارجنگ انفراسٹرکچر کو بہتر بنانے کے لئے 3 سالہ ایکشن پلان متعارف کرایا تھا جس کا مقصد 2027 کے آخر تک ملک بھر میں 2 کروڑ 80 لاکھ چارجنگ سہولیات کا نیٹ ورک قائم کرنا ہے جس میں عوامی چارجنگ کی گنجائش 30 کروڑ کلوواٹ سے تجاوز کر جائے گی۔