تہران (شِنہوا) ایرانی قانون ساز نے کہا ہے کہ اسلامی جمہوریہ کے خلاف امریکہ اور اسرائیل کی جنگ میں مبینہ شمولیت کی وجہ سے یوکرین ایران کا ہدف بن چکا ہے۔
ایران کی قومی سلامتی اور خارجہ پالیسی کے متعلق پارلیمانی کمیٹی کے سربراہ ابراہیم عزیزی نے سوشل میڈیا پلیٹ فارم ایکس پر لکھا ہے کہ اسرائیلی حکومت کو ڈرون کی مدد فراہم کرکے ناکام یوکرین عملاً جنگ میں شامل ہو چکا ہے اور اقوام متحدہ کے منشور کے آرٹیکل 51 کے تحت اس نے اپنے پورے علاقے کو ایران کے لئے ایک جائز ہدف بنا دیا ہے۔
یوکرین کی وزارت خارجہ نے اس پر ردعمل دیتے ہوئے ایک بیان میں اس دھمکی کو مضحکہ خیز قرار دیا۔
جمعہ کے روز یوکرین کے صدر وولودیمیر زیلنسکی نے کہا تھا کہ ایران کے ڈرونز کا مقابلہ کرنے کے لئے اب تک 10 سے زیادہ ممالک ان سے مدد طلب کر چکے ہیں۔
دوسری جانب امریکی صدر ڈونلڈ ٹرمپ نے یوکرین کی مہارت کو عوامی طور پر مسترد کرتے ہوئے جمعہ کو فاکس نیوز کو بتایا کہ امریکہ کے پاس درحقیقت دنیا کے بہترین ڈرونز ہیں اور اسے یوکرین کی مدد کی ضرورت نہیں۔