اسلام آباد (نیشنل ٹائمز)چیئرمین سینیٹ سید یوسف رضا گیلانی نے کہا کہ خطے میں پائیدار امن، استحکام اور سلامتی کے قیام کے لیے مکالمہ اور سفارت کاری ہی سب سے مؤثر ذرائع ہیں۔ پاکستان ہر مشکل گھڑی میں آذربائیجان کے ساتھ کھڑا رہے گا ۔ان خیالات کا اظہار انہوں نے سپیکر ملی مجلس آذربائیجان صاحبہ غفاروا سے ٹیلیفونک گفتگو کے دوران کیا جس میں خطے کی تازہ صورتحال اور باہمی دلچسپی کے امور پر تبادلۂ خیال کیا گیا۔ چیئرمین سینیٹ نے حالیہ ڈرون حملوں کے تناظر میں آذربائیجان کی حکومت اور عوام کے ساتھ پاکستان کی بھرپور یکجہتی کا اظہار کیا۔ انہوں نے کہا کہ اس نوعیت کے حملے بین الاقوامی قوانین اور خودمختار ریاستوں کے درمیان تعلقات کے اصولوں کی خلاف ورزی ہیں اور اس طرح کے اقدامات خطے کے امن و استحکام کو نقصان پہنچاتے ہیں۔