لاہور (نیشنل ٹائمز) امیر جماعت اسلامی حافظ نعیم الرحمن نے ضلع وسطی کے زیر اہتمام فتح باغ بلاک ایف نارتھ ناظم آباد میں ‘‘امریکا و اسرائیل مردہ باد’’ جلسہ عام اور دعوتِ افطار سے خطاب کرتے ہوئے کہا کہ امریکا اسرائیل کے ساتھ مل کر مسلم ممالک کو نشانہ بنا رہا ہے ۔ غزہ میں 75 ہزار سے زائد فلسطینی شہید کئے جا چکے ہیں اور اسرائیل نے فاسفورس بموں کا استعمال کیا جس سے شدید تباہی ہوئی۔ امریکا ایران میں قیادت کی تبدیلی چاہتا تھا مگر اپنے منصوبے میں ناکام رہا۔ اسرائیل کا مقصد صرف ایران کو نشانہ بنانا نہیں بلکہ وہ نیل سے فرات تک گریٹر اسرائیل کے قیام کا خواب دیکھ رہا ہے جبکہ امریکا اس کی کھل کر پشت پناہی کر رہا ہے ۔ ایسی صورتحال میں عالم اسلام کو متحد ہو کر امریکا اور اسرائیل کے خلاف جدوجہد اور فیصلہ کن اقدامات کرنے کی ضرورت ہے ۔انہوں نے پٹرول کی قیمتوں میں 55 روپے اضافے کو مسترد کرتے ہوئے کہا کہ موجودہ حالات میں وزیر اعظم کو اعلان کرنا چا ہئے کہ کوئی بھی سرکاری افسر 1300 سی سی سے بڑی گاڑی استعمال نہ کرے ۔ انہوں نے سوال کیا کہ جب عالمی سطح پرپٹرول کی قیمتوں میں کمی ہوئی تو حکومت نے اس وقت عوام کو ریلیف کیوں نہیں دیا۔