تحریر: عابد حسین قریشی

الحمدللہ میری تیسری کتاب “عجز عاجزانہ” نستعلیق پبلیکیشن اردو بازار لاہور سے شائع ہوچکی ہے۔ عرض مصنف کے نام سے میرا لکھا طویل دیباچہ اس کتاب کا حصہ ہے۔ کسی مناسب موقع پر اسے بھی شیئر کیا جا سکتا ہے۔ عدل بیتی اور تجاہل عادلانہ کے برعکس یہ کتاب نہ سیاسی ہے، نہ سماجی، نہ اس میں عدل و انصاف کو موضوع بنایا گیا ہے، نہ ہی گزرے شب و روز کے قصے ہیں، بلکہ اس کتاب کا رنگ اور انگ ہی مختلف اور منفرد ہے۔ یہ اس خاکسار پر اللہ تعالٰی کا خاص کرم اور اسکے حبیب مکرم صلی اللہ علیہ وآلہ وسلم کے فیض و برکت کی خاص عطا ہے، کہ مجھے قرآن پاک، حامل قرآن صلی اللہ علیہ وآلہ وسلم اور اہل بیت اطہار علیہ السلام پر 63 مضامین لکھنے کی سعادت ملی۔ یہ تقریباً دو سو چالیس صفحات پر مشتمل کتاب قرآن پاک سے لئے گئے مختلف پیغامات، سیرت النبی صلی اللہ علیہ وآلہ وسلم کے بہت خوبصورت اور دلربا پہلو، مسئلہ ختم نبوت پر چار پانچ تحقیق و عشق کی چاشنی میں قلمبند کئے گئے مضامین، اور اہل بیت اطہار علیہ السلام کی شان و عظمت میں لکھی چند ایمان افروز تحریریں شامل ہیں۔ یہ دعوٰی تو نہیں کیا جاسکتا، مگر اس کتاب میں مسئلہ ختم نبوت پر لکھے گئے آرٹیکلز انشاءاللہ عاشقان رسول اور عقیدہ ختم نبوت کے پروانے حوالہ کے طور پر پیش کر سکیں گے۔ عجز عاجزانہ پر ملک کے نامور اہل قلم اور اہل فکر و دانش نے پیش لفظ لکھ کر میرا مان بڑھایا ہے۔ مجھے اپنی علمی کم مائیگی کا شدید احساس ہے، اسی لئے اس کتاب کا نام عجز عاجزانہ رکھا ہے، مگر یہ عشق رسول صل اللہ علیہ وآلہ وسلم کی محبت اور سرشاری میں لکھی گئی کتاب ہے۔ جو پڑھنے والوں کو عشق مصطفٰی صل اللہ علیہ وآلہ وسلم سے سرمست بلکہ وجد و کیف سے ہمکنار کردے گی۔میری مالک کائنات سے دعا ہے، کہ وہ عجز عاجزانہ کو میرے لئے،میرے مرحومین والدین اور اہل و عیال کے لئے توشہ آخرت بنا دے۔آمین۔