بیجنگ (شِنہوا) چین کے تیان گونگ خلائی سٹیشن پر موجود شین ژو-21 کے خلانوردوں نے خلا میں اپنے پہلے 3 ماہ کامیابی سے مکمل کر لئے ہیں اور تمام طے شدہ امور خوش اسلوبی سے آگے بڑھ رہے ہیں۔
چین کے انسان بردار خلائی ادارے کے مطابق اتوار کی رات چائنہ میڈیا گروپ کی ایک ویڈیو رپورٹ میں خصوصی طور پر دکھایا گیا ہے کہ کشش ثقل کی غیر موجودگی کے جسمانی اثرات سے نمٹنے کے لئے مشن کے کمانڈر ژانگ لو اور خلانورد وو فی اور ژانگ ہونگ ژانگ نے ٹانگوں کے نچلے حصے کی عضلاتی قوت کی تحریک کے ایک ٹیسٹ کو انجام دیا۔
انہوں نے بائیونک چپکنے والے جوتے جیسے مخصوص آلات کا استعمال کرتے ہوئے ورزش کی تاکہ اپنی ٹانگوں کے عضلات کو متحرک کیا جا سکے اور خلا میں عضلات کی مطابقت کے مطالعے کے لئے ڈیٹا جمع کیا۔
خلا میں طبی تحقیق کے شعبے میں انہوں نے ایک فارماکوکینیٹکس پراجیکٹ میں پیش رفت کی ہے، جو یہ مطالعہ کرتا ہے کہ خلا میں انسانی جسم میں دوائیں کس طرح پروسیس ہوتی ہیں۔ اس کے لئے انہوں نے تھوک کے نمونے جمع کئے، جو تجزیے کے لئے زمین پر بھیجے جائیں گے تاکہ خلا میں دواؤں کے استعمال کو بہتر طریقے سے منظم کیا جا سکے۔
یہ تینوں خلانورد انسانی نفسیات کے متعدد ٹیسٹ بھی کر چکے ہیں، جن میں انسان اور کمپیوٹر کے درمیان اعتماد، مدار میں جذباتی کیفیات اور ہنگامی صورتحال میں فیصلہ سازی کی صلاحیتوں کا جائزہ شامل ہے۔
رپورٹ میں بتایا گیا ہے کہ خلا ورد پہلے ہی متعدد طبی معائنوں سے گزر چکے ہیں، جن میں ڈائنامک الیکٹروکارڈیوگرامز، بلڈ پریشر کی نگرانی، الٹراساؤنڈ معائنہ اور ہڈیوں کی کثافت کی پیمائش شامل ہیں، جن کے نتائج سے ظاہر ہوا کہ وہ اچھی صحت میں ہیں۔