اسلام آباد (نیشنل ٹائمز) بیرون ملک سے درآمد ہونے والے استعمال شدہ موبائل فونز کے لیے ایف بی آر نے کسٹمز ویلیو میں نمایاں کمی کر دی ہے، جس کے نتیجے میں چار بڑے برانڈز کے 62 ماڈلز سستے ہو جائیں گے۔ ایف بی آر کے ڈائریکٹوریٹ جنرل آف کسٹمز ویلیوایشن کراچی نے نئے اور کم ویلیوایشن ریٹس جاری کر دیے ہیں۔

نظرثانی کے بعد ایپل، سام سنگ، گوگل پکسل اور ون پلس کے متعدد ماڈلز کی کسٹمز ویلیو کم یا پہلی بار مقرر کی گئی ہے، جس سے درآمد شدہ فونز پر عائد پی ٹی اے ٹیکس میں بھی واضح کمی متوقع ہے۔ خاص طور پر ایپل آئی فونز کی کسٹمز ویلیو میں 32 سے 89 فیصد تک کمی کی گئی ہے۔

نئے ریٹس کے مطابق استعمال شدہ آئی فونز کی تشخیصی قیمتیں اب ماڈل کے لحاظ سے تقریباً 95 ڈالر سے 295 ڈالر کے درمیان رکھی گئی ہیں، جبکہ دیگر برانڈز میں سام سنگ، گوگل پکسل اور ون پلس کے فونز نسبتاً کم اور حقیقت پسندانہ قیمتوں پر ویلیو کیے گئے ہیں۔

حکام کے مطابق نئی ویلیوایشن کا مقصد بین الاقوامی ری سیل مارکیٹ اور فون کی اصل حالت کو مدنظر رکھنا ہے تاکہ غیر ضروری تنازعات، کلیئرنس میں تاخیر اور اضافی اخراجات سے بچا جا سکے، جس کا فائدہ براہ راست صارفین کو ہوگا۔