اسلام آباد(نیشنل ٹائمز)حکومت نے گیس سیکٹر کا گردشی قرضہ ختم کرنے کے لیے پٹرولیم مصنوعات پر مزید 5 روپے پی ڈی ایل بڑھانے کا منصوبہ تیار کر لیا۔
ذرائع کے مطابق گیس سیکٹر کے گردشی قرضے 3180 ارب میں سے 17 سو ارب روپے کی سیٹلمنٹ کرنے کا پلان تیار کیا گیا ہے، 14 سو ارب روپے نان ریکوری، لائن لاسز، ٹیرف ڈیفرینشل، 3 سو ارب روپے ٹیکس اور سود کے شامل ہیں۔بتایا گیا ہے کہ منصوبے کے تحت گیس سیکٹر کا گردشی قرضہ آئندہ 6 برسوں کے دوران ختم کر دیا جائے گا، تجاویز میں شامل ہے کہ پٹرولیم مصنوعات پر مزید 5 روپے پٹرولیم ڈولپمنٹ لیوی بڑھا دی جائے، گیس کمپنیوں سے ملنے والے ڈیویڈنڈ کو واپس منتقلی سے گردشی قرضہ ختم کرنے کیلئے سیٹل کیا جائے۔تجویز دی گئی ہے کہ پٹرولیم مصنوعات پر 5 روپے اضافی پی ڈی ایل عائد کرنے سے ساڑھے 5 سو ارب روپے وصول ہوں گے، ڈیویڈنڈ اور اضافی ٹیرف لگا کر تقریبا 7 سو ارب روپے گردشی قرضہ کیلئے ایڈجسٹ کیے جائیں گے۔ذرائع نے بتایا ہے کہ منصوبے کے تحت ایل این جی کارگوز میں کمی لا کر 5 سو ارب روپے کے لگ بھگ بچت کی جائے گی، گیس سیکٹر گردشی قرضہ ختم کرنے کیلئے منصوبے کی وزیراعظم آفس اور وزارت خزانہ سے منظوری لی جائے گی۔