راولپنڈی(نیشنل ٹائمز)پاک بحریہ کا پی این ایس سیف سمندری طوفان ’دتواہ‘ سے متاثرہ سری لنکن شہریوں کے لیے فوری امداد لے کر کولمبو بندرگاہ پہنچ گیا۔
پاک فوج کے شعبہ تعلقات عامہ ( آئی ایس پی آر) کے مطابق اِس امدادی مشن میں پاک بحریہ کے پی این ایس سیف اور عملے نے خوراک، ضروری ادویات اور دیگر امدادی سامان سری لنکا پہنچایا ہے اور انسانی ہمدردی کے طور پر یہ امداد پہنچائی گئی ہے۔ترجمان پاک فوج کا کہنا تھا کہ پاک بحریہ نے بحری جہازوں کے ذریعے جس امدادی سامان کی ترسیل شروع کی ہے، اِس میں خشک راشن ، پکا ہوا کھانا، ادویات اور دیگر ضروری اشیاء شامل ہیں، تمام اشیا سری لنکن حکام کے حوالے کردی گئیں ہیں۔آئی ایس پی آر کے مطابق انسانی ہمدردی کا مظاہرہ کرتے ہوئے یہ امداد سری لنکا کے ساتھ پاکستان کی جانب سے یکجہتی اور انسانی ہمدردی کا اظہار ہے۔ترجمان پاک فوج کا مزید کہنا تھا کہ پاکستان کی جانب سے اِس امداد کا مقصد طوفان سے متاثرہ افراد کو فوری ریلیف فراہم کرنا ہے، پاک بحریہ مزید معاونت کے لیے بھی امداد کی فراہمی جاری رکھے گی۔