برسلز (نیشنل ٹائمز) برسلز میں منعقدہ چوتھے یورپی یونین انڈو پیسفک وزارتی فورم کے موقع پر نائب وزیراعظم و وزیر خارجہ سینیٹر محمد اسحاق ڈار نے ہنگری کے وزیر خارجہ پیٹر سیجارٹو سے ملاقات کی۔ ملاقات میں دوطرفہ تعلقات اور باہمی دلچسپی کے شعبوں میں تعاون بڑھانے پر گفتگو ہوئی۔
نائب وزیراعظم و وزیر خارجہ نے کہا کہ پاکستان ہنگری کے ساتھ دوطرفہ اور یورپی یونین دونوں سطحوں پر اپنے تعلقات کو بڑی اہمیت دیتا ہے۔ دونوں وزرائے خارجہ نے سیاسی، اقتصادی، تجارتی، ثقافتی، دفاعی اور عوامی روابط سمیت دوطرفہ تعلقات کے تمام پہلوؤں پر تبادلہ خیال کیا۔
فریقین نے دوطرفہ تعلقات میں حالیہ پیش رفت کا جائزہ لیتے ہوئے مختلف شعبوں میں مزید تعاون کے فروغ کے عزم کا اعادہ کیا۔ نائب وزیراعظم و وزیر خارجہ نے تجارت اور سرمایہ کاری کے شعبوں میں دوطرفہ تعاون بڑھانے کی ضرورت پر زور دیا، جبکہ ہنگری کے وزیر خارجہ نے پاکستان میں ہنگری کی سرمایہ کاری کے لیے حمایت اور تعاون کی پیشکش پر شکریہ ادا کیا۔
ملاقات میں علاقائی اور عالمی امن و سلامتی سے متعلق امور پر بھی گفتگو ہوئی۔ دونوں ممالک نے باہمی افہام و تفہیم کے فروغ اور دوطرفہ و کثیر القومی فورمز پر مشترکہ مفادات کے شعبوں میں تعاون مضبوط بنانے کے لیے مشترکہ کوششیں جاری رکھنے پر اتفاق کیا۔
ملاقات کے اختتام پر، دونوں وزرائے خارجہ نے 2026–2028 کے لیے ’’اسٹیپینڈیم ہنگریکم پروگرام‘‘ کے فریم ورک کے تحت تعاون کی تجدید سے متعلق مفاہمت نامے (MOU) پر دستخط کیے۔