برسلز (نیشنل ٹائمز) برسلز کے دورہ کے دوران نائب وزیراعظم و وزیر خارجہ سینیٹر محمد اسحاق ڈار نے نیٹو ہیڈ کوارٹرز کا دورہ کیا جہاں سیکرٹری جنرل نیٹو مارک روٹے نے ان کا خیرمقدم کیا۔ بعدازاں دونوں رہنماؤں کی ملاقات ہوئی جس میں علاقائی صورتحال اور باہمی دلچسپی کے اہم علاقائی و عالمی سلامتی کے امور پر تبادلہ خیال کیا گیا۔
نائب وزیراعظم و وزیر خارجہ نے علاقائی صورتحال پر پاکستان کا مؤقف پیش کرتے ہوئے مذاکرات، سفارت کاری اور بین الاقوامی قوانین و معاہدوں کی پاسداری کی ضرورت پر زور دیا۔ انہوں نے کہا کہ پاکستان جنوبی ایشیا کو پرامن، مستحکم اور خوشحال بنانے کیلئے اپنا مثبت کردار ادا کرنے کیلئے پرعزم ہے۔
فریقین نے پاکستان اور نیٹو کے مابین تعلقات کے فروغ اور باہمی تعاون کے مختلف پہلوؤں پر بھی گفتگو کی۔
اس موقع پر سیکرٹری خارجہ آمنہ بلوچ اور یورپی یونین، بیلجیئم اور لکسمبرگ کیلئے پاکستان کے سفیر رحیم حیات قریشی بھی ملاقات میں موجود تھے۔