برسلز (نیشنل ٹائمز) نائب وزیراعظم و وزیر خارجہ سینیٹر اسحاق ڈار نے برسلز میں یورپی یونین کے کمشنر برائے امور داخلہ و مائیگریشن میگنس برونر سے ملاقات کی۔ فریقین نے حال ہی میں منعقد ہونے والے پاکستان۔ای یو مائیگریشن موبلٹی ڈائیلاگ کو سراہا اور یورپی یونین میں ہنر مند لیبر کی قانونی نقل مکانی کو آسان اور منظم بنانے کے لیے ڈائیلاگ فریم ورک کی اہمیت پر زور دیا۔
دونوں جانب نے نقل مکانی اور مزدوروں کی نقل و حرکت سے متعلق امور پر بڑھتے ہوئے دوطرفہ تعاون پر اطمینان کا اظہار کیا۔ نائب وزیراعظم و وزیر خارجہ نے کہا کہ پاکستان ’’یورا معاہدے‘‘ پر عملدرآمد کو یقینی بنانے کے لیے پرعزم ہے۔
کمشنر برونر نے غیر قانونی ہجرت کی روک تھام کے لیے پاکستان کی کوششوں کی تعریف کی۔ دونوں اطراف نے ’’پاکستان۔یورپی یونین ٹیلنٹ پارٹنرشپ روڈ میپ‘‘ کے تحت غیر قانونی ہجرت کی روک تھام اور قانونی راستوں کے فروغ کے عزم کا اعادہ بھی کیا۔
سیکرٹری خارجہ آمنہ بلوچ اور یورپی یونین، بیلجیئم اور لکسمبرگ کے لیے پاکستان کے سفیر رحیم حیات قریشی بھی ملاقات میں موجود تھے۔
